የ2017 ዳይመንድ ሊግ በውድድሩ ታሪክ ለመጀመሪያ ግዜ ኢትዮጵያዊያን አትሌቶች ካሸናፊዎቹ ተርታ ሳይገቡ የቀሩበት ሆኖ ተጠናቋል

የ2017 ብራስልስ ዳይመንድ ሊግ አሸናፊዎች (Photo © Organizers)

በብራስልስ በተከናወነው ሁለተኛ የፍፃሜ ውድድር ቀሪዎቹ 16 አሸናፊዎች ታውቀዋል

ከ2017 የአይ.ኤ.ኤ.ኤፍ ዳይመንድ ሊግ የፍፃሜ ውድድሮች ሁለተኛውና የመጨረሻው የሆነው የብራስልስ ዳይመንድ ሊግ ውድድር በትላንትናው ዕለት ተካሂዶ ሲጠናቀቅ ቀሪዎቹ 16 የዓመቱ ሻምፒዮኖች ተለይተው የታወቁ ሲሆን ለስምንተኛ ግዜ የተካሄደው የዘንድሮው ውድድር አንድም ኢትዮጵያዊ አትሌት ከዳይመንድ ሊጉ የዓመቱ አሸናፊዎች ተርታ መግባት ሳይችል የቀረበት ሆኗል፡፡

የ2017 ብራስልስ ዳይመንድ ሊግ አሸናፊዎች (Photo © Organizers)

በሁለተኛው የፍፃሜና የዓመቱ የመጨረሻ የዳይመንድ ሊግ ውድድር በአዲሱ የውድድር ፎርማት ለፍፃሜው የበቁት አትሌቶች በ16 የውድድር አይነቶች የዓመቱን የዳይመንድ ሊግ ሻምፒዮንነት ክብር፣ የዳይመንድ ዋንጫ እና የ50 ሺህ ዶላር የገንዘብ ሽልማት የግላቸው ለማድረግ ተፎካክረው ቀሪዎቹ 16 ሻምፒዮኖች ታውቀዋል፡፡

አዲሱ የዳይመንድ ሊግ የፍፃሜ ፉክክር ፎርማት ባስከተላቸው ያልተጠበቁ ድሎች ታጅቦ በተጠናቀቀው የብራስልሱ ውድድር ላይ ሰባት አዳዲስ የዳይመንድ ሊግ ዋንጫ አሸናፊዎች የተከሰቱ ሲሆን ባለፈው ሳምንት በዙሪክ የ200ሜ. ሻምፒዮን መሆን ችላ የነበረችው የባህማሷ ሻውኔ ሚለር-ዩቦ ብራስልስ ላይም በ400ሜ. ሌላ የዋንጫ ድልን አሳክታለች፡፡ አሜሪካዊው ስሉስ ዘላይ ክርስቲያን ቴይለር እና ክሮሺያዊቷ ዲከስ ወርዋሪ ሳንድራ ፔርኮቪች በተመሳሳይ ለስድስተኛ ግዜ የዳይመንድ ሊጉን ዋንጫ ባነሱበት ምሽት የዘንድሮውን የውድድር ዓመት ያለምንም ሽንፈት ያጠናቀቁት በሀገሯ ሩሲያ ላይ ከዶፒንግ ጋር በተያያዘ በተጣለው ቅጣት ምክንያት እራሷን ወክላ በመወዳደር ላይ የምትገኘው የከፍታ ዝላይ ተወዳዳሪ ማሪያ ላሲትስኬኒ እና ግሪካዊቷ ምርኩዝ ዘላይ ካተሪና ስቴፋኒዲ በተመሳሳይ ለሁለተኛ ግዜ የዳይመንድ ሊግ ሻምፒዮን ለመሆን በቅተዋል፡፡

በብራስልስ በወንዶቹ በኩል በተደረጉት ሰባት የፍፃሜ ፉክክሮች በ200ሜ. አሜሪካዊው ኖሀ ላይልስ፣ በ800ሜ. ቦትስዋናዊው ኒጄል አሞስ፣ በ3000ሜ. መሰናክል ኬንያዊው ኮንሴስለስ ኪፕሩቶ፣ በ110ሜ. በሀገሩ ሩሲያ ላይ ከዶፒንግ ጋር በተያያዘ በተጣለው ቅጣት ምክንያት እራሱን ወክሎ በመወዳደር ላይ የሚገኘው ሰርጌይ ሹቦንኮቭ፣ በስሉስ ዝላይ አሜሪካዊው ክርስቲያን ቴይለር፣ በኦሎሎ ውርወራ አሜሪካዊው ዳረል ሂል እና በዲስከስ ውርወራ ሊቱዋኒያዊው አንድሪዩስ ጉዲዚስ የዓመቱ የዳይመንድ ሊግ ሻምፒዮን ለመሆን በቅተዋል፡፡

ኢትዮጵያውያን አትሌቶችም በ1500ሜ. እና 5000ሜ. የፍፃሜው ውድድር ተፎካካሪዎች በነበሩበት የሴቶቹ ምድብ ብራስልስ ላይ ዘጠኝ ውድድሮች ተከናውነዋል፡፡ በለንደኑ የዓለም ሻምፒዮና የ100ሜ. እና በዙሪኩ የዳይመንድ ሊግ የ200ሜ. ፍፃሜዎች ለአሸናፊነት ተጠብቃ ውጤታማ መሆን ሳትችል የቀረችው ጃማይካዊቷ ኤላኔ ቶምፕሰን በብራስልስ የ100ሜ. አሸናፊ በመሆን የሪዮ ኦሊምፒክ የድርብ ድል ባለቤት በነበረችበት ዓመት ማግስት ለገጠማት የውጤት ቀውስ መፅናኛ የሚሆናትን ዋንጫ አግኝታለች፡፡

ኢትዮጵያውያን አትሌቶችም የፍፃሜው ተፎካካሪ በነበሩበት የሴቶች 1500ሜ. ውድድር የተጠበቀው ብርቱ ፉክክር በኬንያዊቷ የዓለም ሻምፒዮን ፌይዝ ኪፕዬጎን እና በትውልደ ኢትዮጵያዊቷ የኔዘርላንድስ ተወዳዳሪ ሲፋን ሀሳን መካከል የታየ ሲሆን ኪፕዬጎን በመጨረሻዎቹ ጥቂት ሜትሮች ውስጥ ባሳየችው ድንቅ የአጨራረስ ብቃት የዳይመንድ ሊጉ አሸናፊ ሆናለች፡፡ ኪፕዬጎን የዓመቱ የራሷ ምርጥ በሆነ 3 ደቂቃ ከ57.04 ሰዓት አንደኛ ሆና ባጠናቀቀችበት ፉክክር ላይ ተሳታፊ የነበሩት ኢትዮጵያውያኑ ጉዳፍ ፀጋዬ በ4:00.36 አራተኛ፣ በሱ ሳዶ በ4:03.83 ዘጠነኛ፣ ዳዊት ስዩም በ4:12.92 አስራ ሁለተኛ ሆነው አጠናቀዋል፡፡

ኢትዮጵያውያኑ ሰንበሬ ተፈሪ፣ ለተሰንበት ግደይ እና እቴነሽ ዲሮ ተሳታፊ የነበሩበትን የሴቶች 5000ሜ. ፉክክር ኬንያዊቷ የርቀቱ የዓለም ሻምፒዮን ሔለን ኦቢሪ በበላይነት በማጠናቀቅ የዳይመንድ ሊጉንም ዋንጫ የግሏ አድርጋለች፡፡ ኦቢሪ ውድድሩን በበላይነት ለማጠናቀቅ 14 ደቂቃ ከ25.88 ሰከንድ የፈጀባት ሲሆን ሌላኛዋ ኬንያዊት ካሮሊኔ ኪፕኪሩዪ የራሷ ምርጥ በሆነ 14፡27.55 ሁለተኛ ወጥታለች፡፡ በውድድሩ መሀል የመውደቅ አደጋ ያጋጠማት ኢትዮጵያዊቷ ሰንበሬ ተፈሪ ከወደቀችበት ተነስታ በመሮጥ በ14፡32.03 ሶስተኛ ሆና ለመጨረስ የበቃች ሲሆን ለተሰንበት ግደይ በ14፡42.74 ሰባተኛ እቴነሽ ዲሮ በ15፡07.69 አስራ አንደኛ ሆነው አጠናቀዋል፡፡ በውድድሩ ላይ እንደምትሳተፍ ተገልፆ የነበረችው ሌላኛዋ ኢትዮጵያዊት አትሌት ሶፊያ አሰፋ በውድድሩ ላይ ሳትሳተፍ ቀርታለች፡፡

አሜሪካዊቷ ዳሊላህ መሐመድ በ400ሜ. መሰናክል እንዲሁም የሰርቢያዊዋ ኢቫና ስፓኖቪች በርዝመት ዝላይ በብራስልስ የዳይመንድ ሊጉ ሻምፒዮን ለመሆን የበቁ ሌሎች ሴት አትሌቶች ናቸው፡፡

በመሬት ውስጥ በተዘረጋ የኤሌክትሪክ ገመድ ላይ በተፈጠረ ችግር ምክንያት የመብራት መጥፋት ያጋጠመው የዘንድሮው የብራስልስ ዳይመንድ ሊግ በታሰበው መልኩ ተካሂዶ ለመጠናቀቅ የበቃው በጄኔሬቴር ድጋፍ ነው፡፡

በብራስልስ የዳይመንድ ሊግ የፍፃሜ ውድድር ከአንደኛ እስከ ስምንተኛ ያሉትን ደረጃዎች ይዘው ያጠናቀቁት አትሌቶች ከዳይመንድ ሊጉ ዋንጫ በተጨማሪ የገንዘብ ሽልማት የሚያገኙ ሲሆን የሽልማት ገንዘቡ እስከ ስምንተኛ ያሉትን ደረጃዎች ይዘው የሚያጠናቅቁ አትሌቶችን ያካትታል፡፡
የዳይመድን ሊግ የፍፃሜ ተፎካከሪዎች የገንዘብ ሽልማት በአሜሪካን ዶላር
ለ1ኛ. 50,000
ለ2ኛ. 20,000
ለ3ኛ. 10,000
ለ4ኛ. 6,000
ለ5ኛ. 5,000
ለ6ኛ. 4,000
ለ7ኛ. 3,000
ለ8ኛ. 2,000

የዳይመንድ ሊጉ መካሄድ ከጀመረበት 2010 ዓ.ም. ጀምሮ ኢትዮጵያውያን አትሌቶች ቢያንስ በአንድ የውድድር አይነት የዓመቱ አሸናፊ ሳይሆኑ የቀሩበት አጋጣሚ ያልነበረ ሲሆን ዘንድሮ ግን አትሌት ከአጠቃላይ አሸናፊዎቹ ተርታ ሳይገባ የውድድር ዓመቱ ተጠናቋል፡፡

በመካከለኛ እና ረጅም ርቀት ውድድሮች ጠንካራ ተፎካካሪዎች የሆኑት ኢትዮጵያውያን አትሌቶች ከዚህ በፊት በዳይመንድ ሊጉ በየዓመቱ ያስመዘገቧቸው ስኬቶች፡-
በ2010 ዓ.ም. ኢማነ መርጋ የ5000ሜ. አሸናፊ
በ2011 ዓ.ም. ኢማነ መርጋ የ5000ሜ. አሸናፊ
በ2012 ዓ.ም. መሐመድ አማን የ800ሜ. አሸናፊ፣ አበባ አረጋዊ የ1500ሜ. አሸናፊ
በ2013 ዓ.ም. መሐመድ አማን የ800ሜ. አሸናፊ፣ የኔው አላምረው የ5000ሜ. አሸናፊ፣ መሰረት ደፋር የ5000ሜ. አሸናፊ
በ2014 ዓ.ም. ሕይወት አያሌው የ3000ሜ. መሰናክል አሸናፊ
በ2015 ዓ.ም. ዮሚፍ ቀጄልቻ የ5000ሜ. አሸናፊ፣ ገንዘቤ ዲባባ የ5000ሜ. አሸናፊ
በ2016 ዓ.ም. ሐጎስ ገብረሕይወት የ5000ሜ. አሸናፊ፣ አልማዝ አያና የ5000ሜ. አሸናፊ
በ2017 – 0

ከከዚህ ቀደም የኢትዮጵያውያን የዳይመንድ ሊግ ድሎች መካከል በሁለቱም ፆታዎች የ5000ሜ. የበላይ ሆነን ያጠናቀቅንባቸው ስኬቶች በፎቶ

 

Leave a Reply

Your email address will not be published.