ዋልያዎቹ ለማሸነፍ ሲቸገሩ ቅዱስ ጊዮርጊስ ድል አድርጓል

St.-George vs Eth Coffee Amber Champ

ዋልያዎቹ ለማሸነፍ ሲቸገሩ ቅዱስ ጊዮርጊስ ድል አድርጓል

በርዋንዳ ለሚካሄደው የቻን ውድድር እየተዘጋጀ የሚገኘው የኢትዮጵያ ወንዶች ብሔራዊ ቡድን እንዲሁም 80ኛ ዓመት የምስረታ በዓሉን እያከበረ የሚገኘው ቅዱስ ጊዮርጊስ ክለብ በሳምንቱ የመጨረሻ ቀናት ከኒጀር ብሔራዊ ቡድን እና ከኤል-ሜሪክ ክለብ አቻዎቻቸው ጋር የወዳጅነት የአቋም መለኪያ ጨዋታዎችን አድርገው ነበር፡፡ ቀጣዩ ዘገባ ሁለቱን ከወዳጅነት ያለፈ ትንቅንቅ የታየባቸውን ፍልሚያዎች ለመቃኘት ይሞክራል፡፡

Choose from the most used tags

ዋልያዎቹ በኒጀር የተፈተኑበት ፍልሚያ

የኢትዮጵያ ፕሪምየር ሊግ ከተቋረጠ በኋላ ተሰባስበው ለቀናት ልምምዳቸውን ያደረጉት እና የመጨረሻ 23 ተጨዋቾቻቸውን ያሳወቁት ዋልያዎቹ የምዕራብ አፍሪካዋን ደካማ የእግር ኳስ ሀገር ኒጀርን ለመግጠም ወደ ሜዳ ሲገቡ በአዲስ አበባ ስታዲየም የተገኘው ተመልካች ቁጥር አናሳነት በቅርብ ጊዜያት የብሔራዊ ቡድኑ ጨዋታዎች ላይ ያልታየ ነበር፡፡ ይህ በስፍራው የታደሙትን እያነጋገረ እያለ የሀገራቱን ብሔራዊ መዝሙሮች በትክክል ማዘመር አለመ’ቻሉ ደግሞ ይበልጥ አነጋጋሪ እና እንደተለመደው እግር ኳስ ፌዴሬሽኑን ትዝብት ላይ የጣለ ክስተት ሆኖ ነበር፡፡ በዚህ ስሜት ውስጥ ቡድኖቹ ጨዋታቸውን ጀምረዋል፡፡ በአሰልጣኝ ዮሐንስ ሳህሌ የሚመሩት ዋልያዎቹ ብቸኛውን ከፕሪምየር ሊጉ ውጪ የተመረጠ ተጨዋች የሙገር ሲሚንቶው አቤል ማሞን በግብ ጠባቂነት ሲያሰልፉ፣ የደደቢቶቹን ስዩም ተስፋዬ እና ተካልኝ ደጀኔን በመስመር ተከላካይ ስፍራዎች እንዲሁም የቅዱስ ጊዮርጊሱን አስቻለው ታመነ እና የዳሸን ቢራው ያሬድ ባዬን በመሀል ተከላካይ ስፍራዎች አስጀምረዋል፡፡ መሀል ላይ ከዓመታት በኋላ ወደብሔራዊ ቡድኑ የተመለሰው የቅዱስ ጊዮርጊሱ ተስፋዬ አለባቸው እና የኢትዮጵያ ቡናው ጋቶች ፓኖም ተከላካዮቹን ከጥቃት ለመጠበቅ እና የቡድኑን ሚዛን ለመጠበቅ ሲሰለፉ፣ የቅዱስ ጊዮርጊሶቹ በኃይሉ አሰፋ እና ራምኬል ሎክ እንዲሁም የኢትዮጵያ ቡናው ኤልያስ ማሞ ከብቸኛ አጥቂው የአዳማ ከተማው ታፈሰ ተስፋዬ ጀርባ ጨዋታውን ጀምረዋል፡፡ የቡድኑ ቅርፅ 4-2-3-1 የመሰለ ነበር፡፡

የቡድኖቹ ጨዋታ በተለይም የመጀመሪያው አጋማሽ ቀዝቃዛ እና ፍጥነት የሌለው፣ የጎል ሙከራዎች እጅጉን ያነሱበት እና የማይማርክ ነበር፡፡ 4-4-2 በሚመስል አሰላለፍ ጨዋታውን የጀመሩት እንግዶቹ ኒጀሮች በስምንተኛው ደቂቃ ከመስመር በመሬት ተሻግሮ አጥቂው ኢድሪሳ ሀሊዱ ጋርባ ከፍፁም ቅጣት ክልል ጫፍ መትቶ ባስቆጠረው ጎል ቢመሩም እና የጨዋታውን ቅኝት መቆጣጠር ቢችሉም ባለሜዳዎቹ አቻ ለመሆን እና የእንቅስቃሴውን የበላይነት ለመውሰድ ያደረጉት ጥረት ደካማ ነበር፡፡ እንዲያውም ኒጀሮቹ ወደጎል ሲሄዱ የበለጠ ያስፈሩ ነበር፡፡ በፕሪምየር ሊጉ ኃያል የሆኑት ሁለቱ ግዙፍ የተከላካይ አማካዮች ተስፋዬ አለባቸው እና ጋቶች ፓኖም የመሀል ሜዳ የበላይነቱን ለመውሰድም ሆነ የእንቅስቃሴውን ሚዛን ለመቆጣጠር እጅ ተቸግረው ነበር፤ የመስመር ተከላካዮቹ ስዩም ተስፋዬ እና ተካልኝ ደጀኔም በማጥቃቱ ረገድ ቡድኑን ለማገዝ አልቻሉም፡፡ በዚህ አጋማሽ ፊት ላይ ያለው ታፈሰ ተስፋዬም ምንም አይነት እርዳታ አላገኘም፡፡ በ32ኛው ደቂቃ በኃይሉ ከቅጣት ምት አሻግሮ ጋቶች እና ስዩም ሳያገኙት ከቀሩት ኳስ፣ በ43ኛው ደቂቃ ራሱ በኃይሉ ከቅጣት ምት በቀጥታ ሞክሮ ግብ ጠባቂው ሶማይላ አዩባ ካወጣበት ሙከራ እና በባከኑ ደቂቃዎች ተስፋዬ አቀብሎት ራምኬል ሎክ ለመቆጣጠር ሳይችል ከቀረው ኳስ ውጪም ከዋልያዎቹ የሚጠቀስ የጎል ሙከራ አልተመለከትንም፡፡ የሁለተኛው አጋማሽ ጅማሮም ብዙ የተለየ አልነበረም፡፡ መሪዎቹ ኒጀሮች ተረጋግተው ያለስጋት ሲጫወቱ፤ ዋልያዎቹ የማጥቃት ስጋቶች እና የጎል እድሎችን ለመፍጠር ተቸግረው ነበር፡፡ ነገር ግን የ62ኛው ደቂቃ የታደለ መንገሻ በበኃይሉ፣ የ65ኛው ደቂቃ የአስራት መገርሳ በተስፋዬ እንዲሁም የ77ኛው ደቂቃ የሙሉዓለም ጥላሁን በታፈሰ ምትክ ተቀይሮ መግባት ዋልያዎቹ የተሻለ እንዲንቀሳቀሱ እና የጎል አጋጣሚዎችን እንዲፈጥሩ አድርጓቸዋል፡፡ በተለይ በደጋፊዎች ከፍተኛ ጭብጨባ ወደሜዳ የገባው አስራት በጨዋታው ላይ የሚታይ ለውጥ መፍጠር ችሎ ነበር፡፡ የዮሐንስ ልጆች በመጨረሻዎቹ 30 ደቂቃዎች የፈጠሯቸው እድሎች ከዚያ በፊት በነበሩት 60 ደቂቃዎች ከፈጠሯቸው በብዛትም ሆነ በጥራት የላቁ ነበሩ፡፡ በ63ኛው ደቂቃ ጋቶች ከርቀት በመሬት የመታው ኳስ በግብ ጠባቂው ተጨርፎ ሲወጣ ከማእዘን ምቱ የተሻገረውን ኳስም ራሱ ጋቶች በጭንቅላቱ ገጭቶ ሞክሮት ግብ ጠባቂው ደግሞ አውጥቶበታል፡፡ ተቀይሮ የገባው ሙሉዓለም በ84ኛው ደቂቃ ከሌላው ተቀይሮ ገቢ ታደለ የተሰጠውን ኳስ በሚገባ ተቆጣጥሮ በመሬት ወደጎል ያሻገረው ጥሩ ኳስ በተከላካዮች ተደርቦ ሲወጣበት የተገኘውን የማእዘን ምትም ራሱ ሙሉዓለም በጭንቅላቱ ገጭቶ ሞክሮት የኒጀር ተከላካይ ከአግዳሚው ስር በአስደናቂ ሁኔታ መልሶበታል፡፡ ይሄ ጫና ኒጀሮችን ለበርካታ ጥፋቶች እና ቢጫ ካርዶች የዳረገ ሲሆን አሳማኝነቱ ጥያቄ የሚያስነሳ ቢሆንም በ89ኛው ደቂቃ ለተሰጠባቸው የፍፁም ቅጣት ምትም ምክንያት ሆኗል፡፡ ቀድሞውንም ውሳኔዎቻቸው በእንግዶቹ ተቀባይነት ያላገኙላቸው የጨዋታው ዋና አርቢትር በላይ ታደሰ በፍፁም ቅጣት ምት  ክልል ውስጥ ኳስ በእጅ ተነክቷል በሚል ምክንያት የፍፁም ቅጣት ምቱን የሰጡ ሲሆን ከተቃወሟቸው የኒጀር ተጨዋቾች መካከልም አንዱን በቀይ ካርድ ከሜዳ አሰናብተዋል፡፡ ጋቶች ፍፁም ቅጣት ምቱን አስቆጥሮም ቡድኖቹ አቻ ሆነዋል፡፡ ዋልያዎቹ በተጨመሩት የባከኑ ደቂቃዎች ሌላ ጎል አስቆጥረው በድል ለመውጣት የታገሉ ሲሆን የሙሉዓለም በአግዳሚ የተመለሰ ሙከራም ምኞታቸውን እውን ሊያደርግላቸው ተቃርቦ ነበር፡፡ ከማራኪ እንቅስቃሴ እና የጎል ሙከራዎች ይልቅ ብዙ ትግል፣ ትንቅንቅ እና የ‹ወዳጅነት› የማይመስል ያለመግባባት ክስተቶችን ያሳየን ጨዋታም በ1ለ1 ውጤት ተጠናቋል፡፡ ከጨዋታው በኋላ አስተያየታቸውን የሰጡት ዋልያዎቹ አለቃ ዮሐንስ ሳህሌ የተጋጣሚያቸው ሀይል እና ጉልበት ላይ ያመዘነ አጨዋወት እንደፈለጉት እንዳይጫወቱ እንዳደረጋቸው ተናግረዋል፡፡

ቅዱስ ጊዮርጊስ ከአል-ሜሪክ

80ኛ ዓመቱን እያከበረ የሚገኘው ቅዱስ ጊዮርጊስ የስፖርት ክለብ ካዘጋጃቸው ሁለት የወዳጅነት ጨዋታዎች የመጀመሪያውን እሁድ ከሱዳኑ አል-ሜሪክ ጋር አድርጓል፡፡ ፈረሰኞቹ ለብሔራዊ ቡድኑ በርካታ ተጨዋቾችን በማስመረጣቸው እና አሰልጣኙ ማርት ኖይ እንደ ሮበርት ኦዳንካራ እና አዳነ ግርማን የመሰሉ ቁልፍ ተጨዋቾችን ተጠባባቂ ወንበር ላይ በማስቀመጣቸው ባብዛኛው ተጠባባቂ ተጨዋቾች በመጀመሪያ ተሰላፊነት ጀምረዋል፡፡ 4-2-3-1/4-3-3 በሚመስል አሰላለፍ ዘሪሁን ታደለ በቋሚዎች መሀል ቦታውን ሲይዝ፣ ቢያግልኝ ኤልያስ እና አበባው ቡታቆ በመስመር ተከላካይ ስፍራዎች እንዲሁም አምበሉ ደጉ ደበበ እና መሀሪ መና በመሀል ተከላካይ ስፍራዎች ጀምረዋል፡፡ ምንተስኖት አዳነ፣ ምንያህል ተሾመ እና ናትናኤል ዘለቀ አማካይ ስፍራ ላይ ሲሰለፉ፣ አቡበከር ሳኒ እና ዳዋ ሆጤሳ ከፊት አጥቂው ብርያን ኦሞኒ ግራና ቀኝ ጀምረዋል፡፡ ቅዱስ ጊዮርጊሶች አበባው ቡታቆ መትቶት ለጥቂት በአግዳሚው ላይ በወጣው የአምስተኛው ደቂቃ የቅጣት ምት ሙከራ ቢነሳሱም በቀጣዮቹ 15 ደቂቃዎች እንግዶቹ አል-ሜሪኮች ጨዋታውን በመቆጣጠርም ሆኑ ሙከራዎች በማድረግ የተሻሉ ነበሩ፡፡ በስድስተኛው ደቂቃ በጥሩ ቅብብል ጀምረው በረዥሙ የሰነጠቁትን ኳስ አጥቂው ባክሪ አብደልጋዲር አግኝቶ ወደጎል ሞክሮት ዘሪሁን በጣቶቹ ጨርፎ ሲያወጣበት፣ በ13ኛው ደቂቃ አሎክ አካግ ከመሀል ጀምሮ ኳሱን ይዞ ገብቶ የመታው ለጥቂት በአግዳሚው ላይ ወጥቶበታል፡፡ አል-ሜሪኮች ጨዋታውን የተቆጣጠሩ በመሰሉበት ሰዓት ግን ባለሜዳዎቹ ጊዮርጊሶች ሳይጠበቅ የመሪነት ጎል ማስቆጠር ችለዋል፡፡ በ20ኛው ደቂቃ ላይ አበባው ከግራ በኩል ያሻገረውን ጥሩ ኳስ ናትናኤል ዘለቀ በድንቅ ሁኔታ በጭንቅላቱ በማስቆጠር ፈረሰኞቹን መሪ አድርጓል፡፡ ከዚህ ጎል በኋላም ሱዳናዊያኑ በተሻለ የተንቀሳቀሱ እና የጎል ሙከራዎችን ማድረግ የቻሉ ሲሆን በ23ኛው ደቂቃ ባኪት ካሚስ ኳሱን ይዞ ገብቶ መትቶ በአግዳሚው ላይ የወጣበት እና በ41ኛው ደቂቃ በፈጣን ክትትል ሁለት ሙከራዎች አድርገው በቅዱስ ጊዮርጊስ ተከላካዮች ተደርቦ የወጣባቸው የሚጠቀሱ ነበሩ፡፡ ከእረፍት መልስ ጨዋታው የበለጠ የቀዘቀዘ ሲሆን በ67ኛው ደቂቃ ፍራንሲስ ኮፊ በጭንቅላቱ ገጭቶ ዘሪሁን ያወጣበት፣ በ72ኛው ደቂቃ ዳዋ ሆጤሳ በመሬት አሻግሮለት ተቀይሮ የገባው አዳነ ግርማ ጎል ሳያደርገው የቀረው እና በ85ኛው ደቂቃ ሙሳብ ኦማር የመታው እና በዘሪሁን ተጨርፎ የወጣው የቅጣት ምት ብቻ የሚጠቀሱ የጎል ስጋቶች ነበሩ፡፡ በዚህ አጋማሽ ከሙከራዎች ይልቅ የዳኝነት ውዝግቦች የታዩ ሲሆን ተቀይሮ የገባው አይዛክ ኢዜንዴ በ55ኛው ደቂቃ በባክሪ አብደልጋዲር ላይ ጥፋት ሰርቶ እና ተጨዋቹ ከወደቀበት ተነስቶ ሊጣላው ሲመጣ ገፍቶ ሲጥለው የተመለከቱት አርቢትር ብሩክ የማነብርሀን በማስጠንቀቂያ ካርድ ብቻ ማለፋቸው እና በጨዋታው የመጨረሻ ደቂቃ አምበሉ አምር ከማል ከኳስ ውጪ ዳዋን ሲመታው በቀይ ካርድ ማሰናበታቸው እንግዶቹን ያስደሰተ አልነበረም፡፡ ጨዋታውም ከናትናኤል ጎል ተጨማሪ ሳያስተናግድ በፈረሰኞቹ የ1ለ0 ድል ተጠናቋል፡፡

Leave a Reply

Your email address will not be published.