ኢትዮጵያዊቷ ገንዘቤ ዲባባ በበርሚንግሀም የ3000ሜ. የዓለም የቤት ውስጥ ሻምፒዮንነት ክብሯን አስጠበቀች

17ኛው የአይ.ኤ.ኤ.ኤፍ የዓለም የቤት ውስጥ ሻምፒዮና ትላንት ምሽት በበርሚንግሀም ሲጀመር ኢትዮጵያ በሴቶች 3000ሜ. በገንዘቤ ዲባባ አማካይነት የወርቅ ሜዳልያ ድልን ተጎናፅፋለች፡፡ በሁለቱም ፆታዎች የከፍታ ዝላይ እና የሴቶች 3000ሜ. ሩጫ የፍፃሜ ፉክክሮች በተስተናገዱበት የውድድሩ የመጀመሪያ ቀን በጉጉት ሲጠበቅ የነበረውና የእለቱ ውድድሮች መዝጊያ በሆነው የሴቶች 3000ሜ. ፍፃሜ ላይ 14 አትሌቶች ተፎካካሪ ነበሩ፡፡ ከሁለት ዓመት በፊት በዩናይትድ ስቴትስ ፖርትላንድ ያገኘችውን ድልና ክብር የማስጠበቅ አላማን ይዛ የቀረበችው ገንዘቤ በበርሚንግሀሙ ውድድር ላይ ያስመዘገበችውን አስደሳች ድል ለማጣጣም የበቃችውም ከኬንያዊቷ የወቅቱ የዓለም የ5000ሜ. ሻምፒዮን ሄለን ኦቢሪ፣ የ2016 የዓለም የቤት ውስጥ የ1500ሜ. የወርቅ ሜዳልያ አሸናፊ ኔዘርላንዳዊቷ ሲፋን ሀሳን እንዲሁም በአውሮፓ የቤት ውስጥ ሻምፒዮና የድርብ ድል ባለቤት ከሆነችው እንግሊዛዊቷ ላውራ ሙሪ ጋር ብርቱ ፉክክር አድርጋ ነው፡፡

ገንዘቤ ዲባባ እና ፋንቱ ወርቁ ከድሉ በኋላ (Photo © Getty Images for IAAF)

አጀማመሩ ላይ ፍጥነቱ በታክቲክ የታሰረ ይመስል በነበረው ሩጫ ገንዘቤ ከኋላ ሆና ስትከተል የቆየች ሲሆን አንድ ሺህ ሜትር እንደሸፈኑም ወደፊት በመምጣት ቀጣዩን አንድ ሺህ ሜትት በፊት መሪነቱ ስፍራ ላይ የነበረችው ጀርመናዊቷ ኮንስታንዜ ክሎስተርሀልፍን ስትከተል ቆይታለች፡፡ ውድድሩ ሊጠናቀቅ አንድ ሺህ ሜትር ሲቀረው ገንዘቤ የመሪነቱን ስፍራ በመረከብ ውድድሩን ማፍጠን የጀመረች ሲሆን ኬንያዊቷ ሔለን ኦቢሪም በቅርብ ርቀት ስትከትላት ነበር፡፡ ውድድሩ ሊጠናቀቅ ሶስት ዙር ሲቀረው ኦቢሪ እየጨመረ የመጣውን የገንዘቤን ፍጥነት መቋቋም ሳትችል ወደኋላ የቀረች ሲሆን እርሷን አልፈው የመጡት ኔዘርላንዳዊቷ ሲፋን ሀሳን እና እንግሊዛዊቷ ላውራ ሙሪ በመጨረሻዎቹ ሁለት ዙሮች የገንዘቤ ብርቱ ተፎካካሪ ለመሆን ግስጋሴያቸውን አጠናክረው ታይተዋል፡፡ ሆኖም የመጨረሻው ዙር ሲደወል እየቀረቧት ለመጡት ተፎካካሪዎቿ እጅ ላለመስጠት ግስጋሴዋን ያጠናከረችው ገንዘቤ ያለመችውን የአሸናፊነት ግብ በማሳካት የሀገሯን ስም በመጀመሪያው ዕለት በሜዳልያው ሰንጠረዥ አናት ላይ አንዲቀመጥ አድርጋለች፡፡ ገንዘቤ ውድድሩን በበላይነት ለመጨረስ የፈጀባት 8 ደቂቃ ከ45.05 ሰከንድ ነው፡፡ ኔዘርላንዳዊቷ ሲፋን ሀሳን የዓመቱ የራሷ ምርጥ በሆነ 8:45.68 ሁለተኛ እንግሊዛዊቷ ላውራ ሙሪ የራሷ የዓመቱ ምርጥ በሆነ 8:45.78 ሶስተኛ ሆነው ሲያጠናቅቁ ኢትዮጵያን የወከለችው ፋንቱ ወርቁ በ8 ደቂቃ ከ50.54 ሰከንድ ስድስተኛ ሆና ጨርሳለች፡፡

ገንዘቤ ዲባባ ውድድሩን በአሸናፊነት ስታጠናቅቅ (Photo © Getty Images for IAAF)

ድንቅ የታክቲክ አተገባበር፣ የአዕምሮ ጥንካሬን እና ውጤታማ ከመሆን ሊያሰናክሉ ከሚችሉ መገፋፋቶችና መጠላለፎች ራስን ነፃ ማድረግን ይጠይቅ በነበረው የበርሚንግሀሙ ፉክክር ገንዘቤ ሁሉንም በተዋጣለት መልኩ መተግበር ችላለች፡፡ በ3000ሜ. በተከታታይ ለሶስተኛ ግዜ የዓለም የቤት ውስጥ ሻምፒዮን ለመሆን የቻለችው ገንዘቤ በዓለም የቤት ውስጥ ሻምፒዮና የ3000ሜ. ውድድር ታሪክ ከ2004 – 2010 በተከታታይ አራት ግዜ ካሸነፈችው መሰረት ደፋር ቀጥሎ ከፍተኛውን ስኬት ያስመዘገበች እንስት አትሌት ለመሆን በቅታለች፡፡ ኢትዮጵያውያን ሴት አትሌቶች የ3000ሜ. የዓለም የቤት ውስጥ ሻምፒዮና የወርቅ ሜዳልያን በ2012 ዓ.ም. ኢስታንቡል ቱርክ ላይ ሄለን ኦቢሪ ካሸነፈችበት ውጪ በቁጥጥራቸው ስር አድርገውት ይገኛሉ፡፡ ረጅሙን የድል ጉዞ የዛሬ 15 ዓመት የዘንድሮውን ውድድር እያስተናገደች ባለችው በርሚንግሀም ከተማ አሀዱ ብላ በመጀመር ለመሰረት ደፋር እና ለአሁኗ ባለአደራ ገንዘቤ ዲባባ ያቀበለችውም ብርሀኔ አደሬ ነበረች፡፡

የአይ.ኤ.ኤ.ኤፍ የዓለም የቤት ውስጥ ሻምፒዮና የሴቶች 3000ሜ. ሜዳሊስቶች (Photo © Getty Images for IAAF)

በዕለቱ በተደረጉት የከፍታ ዝላይ የፍፃሜ ውድድሮች ከአበረታች መድኃኒት ጋር በተያያዘ የሩሲያ አትሌቲክስ ፌዴሬሽን ተወዳዳሪዎችን እንዳያሳትፍ በመታገዱ ምክንያት በዓለም አቀፉ የአትሌቲክስ ፌዴሬሽኖች ማሕበር ዓርማ ስር ሆነው እንዲወዳደሩ የተፈቀደላቸው በወንዶች ዳኒል ሊሼንኮ በሴቶች ማሪያ ላሲትስኬኒ አሸናፊ ሆነዋል፡፡ የሁለቱ አትሌቶች የወርቅ ሜዳልያ በሀገራቸው ስም የማይመዘገብ በመሆኑ ምክንያትም የገንዘቤ ዲባባ የወርቅ ሜዳልያ ድል በመጀመሪያው ቀን የሜዳልያ ደረጃ ሰኝጠረዥ ላይ የኢትዮጵያ ስም በቀዳሚነት እንዲቀመት አድርጓል፡፡

በውድድሩ የሁለተኛ ቀን ውሎ ኢትዮጵያውያን አትሌቶች በወንዶች 3000ሜ. እና በሴቶች 1500ሜ. የሚያደርጓቸው የማጣሪያ ውድድሮች ይጠበቃሉ፡፡

Leave a Reply

Your email address will not be published.