በ2017 የበርሊን ማራቶን ፉክክር ኢትዮጵያዊው ጉዬ አዶላ የመጀመሪያ ተሳትፎ አዲስ ሪኮርድ የሆነ ሰዓት አስመዘገበ

ጉዬ አዶላ ውድድሩን ሲያጠናቅቅ (Photo © MICHELE TANTUSSI/AFP/GETTY IMAGES)

  • ኬንያውያን በሁለቱም ፆታዎች ቀዳሚ ሆነው ባጠናቀቁበት የዘንድሮው በርሊን ማራቶን ኢትዮጵያውያን አትሌቶች በወንዶች ሁለተኛ እና ሶስተኛ በሴቶች ሁለተኛ ሆነው ጨርሰዋል፡፡
  • በወንዶቹ ፉክክር የተጠበቀው የርቀቱን የዓለም ሪኮርድ የመስበር ዕቅድ ያልተሳካ ሲሆን ይሰብራሉ ተብለው ከተጠበቁት መካከል አንዱ የነበረው ቀነኒሳ በቀለም ውድድሩን ማጠናቀቅ ሳይችል ቀርቷል፡፡

ዘንድሮ ለ44ኛ ግዜ በተከናወነው እና የአቦት ወርልድ ማራቶን ሜጀርስ ውድድሮች አካል በሆነው የ2017 ቢ ኤም ደብሊው በርሊን ማራቶን ውድድር ላይ በርቀቱ የመጀመሪያ ተሳትፎውን ያደረገው ኢትዮጵያዊው ጉዬ አዶላ በመጀመሪያ ተሳትፎ ፈጣኑን ሰዓት የማስመዝገብ ሪኮርዱን ከኬንያዊው ዴኒስ ኪሜቶ መንጠቅ በቻለበት 2:03:46 ሁለተኛ ሆኖ አጠናቋል፡፡

በውድድሩ ያለፈው ዓመት አሸናፊ እና በማራቶን የኢትዮጵያ ሪኮርድ ባለቤት በሆነው ቀነኒሳ በቀለ፣ በሪዮ ኦሊምፒክ የርቀቱ ሻምፒዮን ኬንያዊው ኤሉድ ኪፕቾጌ እንዲሁም በከዚህ ቀደሙ የማራቶን የዓለም ሪኮርድ ባለቤት ኬንያዊው ዊልሰን ኪፕሳንግ መካከል የሚደረገው ብርቱ ፉክክር የዓለም ሪኮርዱን ለመስበር እንደሚያችል በከፍተኛ ሁኔታ ሲጠበቅ በነበረበት የወንዶቹ ውድድር ኤሉድ ኪፕቾጌ አሸናፊ ለመሆን ቢበቃም ሪኮርድ የመስበር ሙከራው ግን አልተሳካም፡፡ ከሶስቱ ተጠባቂ አትሌቶች መካከል ዊልሰን ኪፕሳንግ 30ኛው ኪሎ ሜትር ላይ በድንገት ውድድሩን ያቆመ ሲሆን ቀነኒሳ በቀለም ከ31ኛው ኪሎ ሜትር በኋላ ውድድሩን አቋርጦ ወጥቷል፡፡

በመጨረሻዎቹ 12 ኪሎ ሜትሮች ውስጥ ሳይጠበቅ የኪፕቾጌ የቅርብ ተፎካካሪ ሆኖ የተገኘው በማራቶን የመጀመሪያ ተሳትፎውን እያደረገ የነበረው ኢትዮጵያዊው ጉዬ አዶላ ነበር፡፡ በአራት አሯሯጮች (ፔስ ሜከር) ይመራ የነበረው ፉክክር የዓለም ሪኮርዱን መሰበር በሚቻልበት ፍጥነት (1፡01፡29 በሆነ ሰዓት) የውድድሩ አጋማሽ ላይ የተደረሰበት እና ቀነኒሳ በቀለ ከ22ኛው ኪሎ ሜትር በኋላ የፊት መሪዎቹን ፍጥነት ተከትሎ ለመጓዝ ሲቸገር የተስተዋለበትም ነበር፡፡ ከ30ኛው ኪሎ ሜትር በኋላ የኪፕቾጌ እና ጉዬ የሁለትዮሽ ፉክክር ለመሆን በበቃው ውድድር የተካበተ ልምድ ባለቤቱ ኪፕቾጌ ሁለት ኪሎ ሜትር ሲቀረው ወደፊት በመውጣት በ2፡03፡32 በአሸናፊነት ለማጠናቀቅ ችሏል፡፡

የ2017 ቢ ኤም ደብሊው በርሊን ማራቶን የወንዶች አሸናፊዎች

ከተወዳደራቸው ዘጠኝ ማራቶኖች በስምንቱ አሸናፊ ሆኖ ማጠናቀቅ የቻለው ኪፕቾጌ ከድሉ በኋላ ለዓለም አቀፉ አትሌቲክስ ፌዴሬሽኖች ማሕበር ድረገፅ ዘጋቢው ጆን ሙልኬን በሰጠው አስተያየት ‹‹ጠንካራ ልምምድ አድርጌ ነበር ሆኖም ሁኔታዎች አስቸጋሪ ነበሩ፡፡ የመወዳደሪያ መስመሩም አንሸራታች ነበር›› በማለት በውድድሩ መሐል የጣለው ዝናብ የዓለም ሪኮርዱን መስበር ላለመቻሉ አሉታዊ ተፅዕኖ እንደነበረው ለማመላከት የሞከረ ሲሆን ‹‹ጉዬ አዶላ ያልተጠበቀ ክስተት ነው፡፡ እኔ እና እሱ ብቻችንን ስንቀር ትኩረቴን በሙሉ በአጨራረሴ ላይ ማድረግ ነበረብኝ፡፡ በዚህ ሁኔታ ለማሸነፍ በመብቃቴም ደስተኛ ነኝ›› በማለትም አክሏል፡፡

ሳይጠበቅ ድንቅ ውጤትን ለማስመዝገብ የበቃው ጉዬ አዶላም ከውድድሩ በኋላ ለጆን ሙልኬን በሰጠው አስተያየት ‹‹በውድድሩ ላይ ከመጨረሻዎቹ ሁለት ኪሎ ሜትሮች ውጭ የነበረኝን ቆይታ በሙሉ ተዝናንቼበታለሁ›› ብሏል፡፡ ጉዬ በበርሊን ሁለተኛ ሆኖ ሲያጠናቅቅ ያስመዘገበው 2:03:46 የሆነ ሰዓት በወንዶች የመጀመሪያ የማራቶን ውድድር ተሳትፎ አዲስ ሪኮርድ ሆኖ የተመዘገበ ሲሆን ያሻሻለውም የወቅቱ የማራቶን የዓለም ሪኮርድ ባለቤት ኬንያዊው ዴኒስ ኪሜቶ በ2012 ዓ.ም. በማራቶን የመጀመሪያ ተሳትፎው በርሊን ላይ ሁለተኛ ሆኖ ሲያጠናቅቅ አስመዝግቦት የነበረውን 2፡04፡16 የሆነ ሰዓት ነው፡፡

በጎዳና ላይ ሩጫ ተወዳዳሪነት በተለይም በግማሽ ማራቶን ሯጭነቱ የሚታወቀው ጉዬ አዶላ በ2014 ዓመተ ምህረት በዴንማርክ ኮፐንሀገን በተካሄደው የአይ.ኤ.ኤ.ኤፍ የዓለም ግማሽ ማራቶን ሻምፒዮና ላይ ኢትዮጵያን ወክሎ ቀርቦ የነሐስ ሜዳልያ አሸናፊ ለመሆን በመብቃቱም የሚታወስ ነው፡፡

በወንዶቹ ፉክክር ሶስተኛ ሆኖ ለማጠናቀቅ የበቃውም ኢትዮጵያዊው ሞስነት ገረመው ሲሆን በርቀቱ ለሁለተኛ ግዜ ባደረገው ተሳትፎ በ2፡06፡09 በተሸላሚነት መድረኩ ላይ ከሚወጡት ሶስት አትሌቶች መካከል ሆኖ መጨረስ መቻሉ የሚደነቅ ውጤት ነው፡፡

የ2017 ቢ ኤም ደብሊው በርሊን ማራቶን የሴቶች አሸናፊዎች

ኬንያዊቷ ግላዲስ ቼሮኖ ከውድድሩ በፊት የተሰጣትን የአሸናፊነት ግምት እውን ባደረገችበት የሴቶቹ ፉክክር በ2፡20፡23 አንደኛ ሆና ስታጠናቅቅ ኢትዮጵያዊቷ ሩቲ አጋ (2፡20፡41) እና ኬንያዊቷ ቫላሪ ኢያቤ (2፡20፡53) ሁለተኛ እና ሶስተኛ ሆነው አጠናቀዋል፡፡

በጀርመን ሀገር የሚካሄድ ትልቁ የአንድ ቀን የስፖርት ድግስ በሆነውና የዓለም አቀፉ አትሌቲክስ ፌዴሬሽኖች ማሕበር የወርቅ ደረጃ ባለው ቢ ኤም ደብሊው በርሊን ማራቶን የዘንድሮ ሩጫ ላይ ከ137 ሀገራት የተውጣጡ 43852 ሯጮች ተሳትፈዋል፡፡

በ2017 ቢ ኤም ደብሊው በርሊን ማራቶን የመጀመሪያዎቹን 10 ደረጃዎች ይዘው ያጠናቀቁ አትሌቶች  

በሴቶች
1 ግላዲስ ቼሮኖ (ኬንያ) 2:20:23
2 ሩቲ አጋ (ኢትዮጵያ) 2:20:41
3 ቫላሪ ኢያቤ (ኬንያ) 2:20:53
4 ሄለን ቶላ (ኢትዮጵያ) 2:22:51
5 አና ሀህነር (ጀርመን) 2:28:32
6 ካተሪኔ ቤርቶኔ (ጣልያን) 2:28:34
7 ሶኒያ ሳሙኤልስ (ግሬት ብሪቴይን) 2:29:34
8 አዙኬና ዲያዝ (ስፔን) 2:30:31
9 ካታሪና ሪቤይሮ (ፖርቹጋል) 2:33:13
10 ኪም ዲለን (ኔዘርላንድ) 2:33:24

በወንዶች
1 ኤሉድ ኪፕቾጌ (ኬንያ) 2:03:32
2 ጉዬ አዶላ (ኢትዮጵያ) 2:03:46
3 ሞስነት ገረመው (ኢትዮጵያ) 2:06:09
4 ፌሊክስ ካንዲዬ (ኬንያ) 2:06:13
5 ቺንሰንት ኪፕሩቶ (ኬንያ) 2:06:14
6 ዩታ ሺታራ (ጃፓን) 2:09:03
7 ሂሮአኪ ሳኖ (ጃፓን) 2:11:24
8 ራያን ቬይል (ዩ.ኤስ.ኤ) 2:12:40
9 ሊያም አዳምስ (አውስትራሊያ) 2:12:52
10 ጆናታን ሜሎር (ግሬት ብሪቴይን) 2:12:57

 

Leave a Reply

Your email address will not be published.