ሙክታር እድሪስ የዓለም ሻምፒዮንነት ክብሩን አስጠበቀ

በ5000 ሜትር የአሸናፊነት ክብሩን አስጠብቆ ማቆየት የቻለ የመጀመሪያው ኢትዮጵያዊ 

Photo © Bizuayehu Wagaw

በ17ኛው የዓለም አትሌቲክስ ሻምፒዮና የአራተኛ ቀን ውሎ በኢትዮጵያውያን ዘንድ ከፍተኛ ተጠባቂነት በነበረው የወንዶች 5000 ሜትር የፍፃሜ ውድድር ሙክታር እድሪስ የሻምፒዮንት ክብሩን ሲያስጠብቅ ሰለሞን ባረጋ የብር ሜዳልያ አሸናፊ ሆኗል፡፡ የዶሀው የ5000 ሜትር የወንዶች የፍፃሜ ፉክክር በዓለም ሻምፒዮና ታሪክ ለሶስተኛ ግዜ ከ13 ደቂቃ በታች የተገባበት ሲሆን በ12 ደቂቃ ከ58.85 ሰከንድ አሸናፊ ለመሆን የበቃው ሙክታር ከኬንያዊው ኢስማኤል ኪሩይ እና ከእንግሊዙ ሞ ፋራህ ቀጥሎ በርቀቱ ሁለት እና ከዛ በላይ የሆነ የዓለም ሻምፒዮና ድል ለማስመዝገብ የበቃ አትሌት የሚል አዲስ ታሪክም አፅፏል፡፡ ውድድሩን በ12:59.70 በሁለተኛነት ያጠናቀቀው ወጣቱ ተስፈኛ ሰለሞን ባረጋ በዶሀው ሻምፒዮና ለኢትዮጵያ ሁለተኛ የብር ሜዳልያ ድል አስመዝግቧል፡፡ ካናዳዊው መሐመድ አህመድ በ13፡01.11 የነሐስ ሜዳልያ ተሸላሚ ሲሆን ከቡድን ጓደኞቹ ጋር ኢትዮጵያ ላገኘችው ድል የበኩሉን አበርክቶ ያደረገው ጥላሁን ሀይሌ በ13፡02.29 አራተኛ ሆኖ አጠናቋል፡፡       

በተከታታይ ለሁለተኛ ግዜ የ5000 ሜትር የዓለም ሻምፒዮን መሆን የቻለው ሙክታር ከሁለት ዓመት በፊት ባለፉት ሶስት ሻምፒዮናዎች (ስድስት ዓመታት) የርቀቱን የበላይነት ለብቻው ተቆጣጥሮት የቆየው ሞ ፋራህን በሀገሩ እና በደጋፊው ፊት በመርታት የዓለም ሻምፒዮና የመጀመሪያ የሜዳልያ ድሉን አስመዝግቧል፡፡ ሆኖም ከዘንድሮው የዓለም ሻምፒዮና በፊት የነበረው አቋም ለሜዳልያ አሸናፊነት የቅድሚያ ግምት የሚያሰጠው አይነት አልነበረም፡፡ ለረጅም ግዜ ከጉዳት ጋር እየታገለ የቆየ ሲሆን ዘንድሮ በተሳተፈባቸው ውድድሮች ላይም ጥሩ ውጤት ማስመዝገብ አልቻለም፡፡ በኢትዮጵያ ሻምፒዮና የ10000 ሜትር የውድድር ተሳትፎው አቋርጦ መውጣቱ እንዲሁም በኦስሎ እና ሎዛን ባደረጋቸው የ3000 ሜትር እና 5000 ሜትር ውድድሮች ያስመዘገባቸው ጥሩ ያልሆኑ ውጤቶች በመልካም ሁኔታ ላይ እንዳልነበር ማሳያ ናቸው፡፡ ያለፈው ዓለም ሻምፒዮና የአሸናፊነት ክብሩን ለማስጠበቅ እንዲሞክር የሚሰጠው በቀጥታ የመሳተፍ ዕድል ባይኖረው ኖሮም በዶሀው ውድድር ላይ ኢትዮጵያን የመወከል ዕድሉን አያገኝም ነበር፡፡

Photo © Bizuayehu Wagaw

ሙክታር  ከድሉ በኋላ አስተያየቱን ሲሰጥ ‹‹በዝግጅት ወቅት ጠንካራ ልምምዶች ሲሰሩ በሕመም ምክንያት ብዙም አልሰራሁም፡፡ ተጋባዥ ስለነበርኩ ዝም ብዬ ለሞራሉ መጣሁ እንጂ ሚኒማም አላሟላሁም፡፡ በዶሀም ከማጣሪያው ውድድር በኋላ በጣም አሞኝ ቀን በቀን እየታሸሁ ስለነበረ አሸንፋለሁ ብዬ አልጠበቅኩም፡፡ እኔ መጀመሪያም ወጥቼ የመራሁት ሊያመኝ ስለሚችል የአቅሜን አድርጌ ከዛ በኋላ የምትችሉትን ታደርጋላችሁ ብዬ ነበር፡፡ ተነጋግርን ስለነበር ሁለት ዙር ሄድኩኝ ከዛ በኋላ ተቀበሉኝ፡፡ መጨረሻ ላይ የኖርዌዩ ልጅ ሲወጣባቸው ነው ደንግጬ ይሄን ያክል ስንለፋ ውለን በዚህ ሰዓት ዕድሉን ልንሰጥ ነው ወይ በማለት የመጨረሻ አሯሯጤን ስቀይር ያሸነፍኩት›› ብሏል፡፡

የብር ሜዳልያ አሸናፊ ሰለሞን ባረጋም ‹‹ከአንደኛ እስከ ሶስተኛ ተከታትለን የመግባት ዕቅዱ ነበረን፡፡ የ1500 ሜትር ተወዳዳሪ የሆኑ ልጆች ስለነበሩ በጣም ፈርተን ነበረ፡፡ ተፎካካሪዎቻችን የአጨራረስ ሩጫ ላይ የተሻለ ፍጥነት እንዳላቸው ስለምናውቅም ዙሩን ለማፍጠን ሞክረናል፡፡ ሙክታር ትንሽ ሕመም ላይ ስለነበር እንዲህ ይሆናል ብለን አልጠበቅንም ነበር፡፡ መሪነቱን ቶሎ የተቀበልነውም ለዛ ነው፡፡ እርሱ የተወሰነ ቢረዳን ኖሮ ዘግተን ለመውጣት እንችል ነበር፡፡ ባጠቃላይ ወርቁን ለኢትዮጵያ የማምጣት እቅዳችን ስለተሳካ ደስተኛ ነኝ›› በማለት የበኩልን አስተያየት ሰጥቷል፡፡

Photo © Bizuayehu Wagaw

በእለቱ ኢትዮጵያዊቷ መቅደስ አበበ በተካፈለችበት የሴቶች 3000 ሜትር መሰናክል ውድድር ኬንያዊቷ ቢያትሪስ ቼፕኮቼች የሻምፒዮንሺፑን ሪኮርድ በሰበረችበት 8፡57.84 የወርቅ ሜዳልያ አሸንፋለች፡፡ ያለፈው ሻምፒዮንነት ክብሯን ለማስጠበቅ የተወዳደረችው አሜሪካዊቷ ኤማ ኮበርን የራሷ ምርጥ በሆነ 9:02.35 ሰዓት የብር እንዲሁም ጀርመናዊቷ ጌሳ ክራውሰ የሀገሯን ብሔራዊ ሪኮርድ ባሻሻለ 9:03.30 የነሐስ ሜዳልያ ደረጃዎችን ይዘው ጨርሰዋል፡፡ በማጣሪው ውድድር ላይ የራሷን ምርጥ ሰዓት ማሻሻል ችላ የነበረችው ኢትዮጵያዊቷ መቅደስ አበበ በፍፃሜው ውድድር ላይ 9:25.66 በሆነ ሰዓት 11ኛ ሆና ብታጠናቅቅም የገባችበት ሰዓት በድጋሚ የራሷን ምርጥ ያሻሻለችበት እንደመሆኑ ልትበረታታ ይገባታል፡፡ በውድድሩ የአምስተኛ ቀን ውሎ ኢትዮጵያውያን አትሌቶች የሚሳተፉበት ብቸኛ ውድድር ከምሽቱ 12፡15 ጀምሮ የሚካሄደው የወንዶች 3000 ሜትር መሰናክል ማጣሪያ ነው፡፡