Connect with us

Articles

በ2016 ዱባይ ማራቶን ፀጋዬ ከበደ እና ከዚህ ቀደም አሸናፊ የሆኑ ስድስት ኢትዮጵያውያን አትሌቶች ይጠበቃሉ

Published

on

Women &  men Dubai 2016

በሴቶች የቀደሞቹ አሸናፊዎች ማሚቱ ዳስካ (የ2010 አሸናፊ)፣ ትርፊ ፀጋዬ (የ2013 አሸናፊ) እና ሙሉ ሰቦቃ (የ2014 አሸናፊ) ብርቱ ተፎካካሪ እንደሚሆኑ የሚጠበቅ ሲሆን በወንዶች የውድድር ስፍራው ሪኮርድ ባለቤት አየለ አብሽሮ (የ2012 አሸናፊ)፣ ፀጋዬ መኮንን (የ2014 አሸናፊ)፣ ለሚ ብርሀኑ (የ2015 አሸናፊ) እና በዱባይ የመጀመሪያ ተሳትፎውን የሚያደርገው የለንደን ማራቶን የሁለት ግዜ አሸናፊ ፀጋዬ ከበደ ፉክክር ከፍተኛ ትኩረትን የሚስብ ይሆናል፡፡

በኢትዮጵያ የቀን አቆጣጠር የፊታችን ጥር 13 ቀን 2008 ዓ.ም. በሚከናወነው የ2016 ስታንዳርድ ቻርተርድ ዱባይ ማራቶን ከዚህ ቀደም በተለመደው መልኩ ብዛት ያላቸው ኢትዮጵያውያን አትሌቶች እንደሚሳተፉ የውድድሩ አዘጋጆች በተከታታይ እያደረሱን ከሚገኘው መረጃ የተረዳን ሲሆን እስካሁን በሁለቱም ፆታዎች ከዚህ ቀደም የውድድሩ አሸናፊ መሆን የቻሉ ስድስት አትሌቶችም ተሳታፊነታቸውን አረጋግጠዋል፡፡ 31ኛው የኦሊምፒክ ጨዋታ የፊታችን ነሐሴ ወር ውስጥ በብራዚል ሪዮ ደ ጃኔይሮ አስተናጋጅነት ሊከናወን ዝግጅቶች እየተገባደዱ ባሉበት በአሁኑ ወቅት በርካታ ታዋቂ አትሌቶችን ለማፎካር ጥቂት ቀናት የቀሩት የዘንድሮው ዱባይ ማራቶን ተሳታፊ አትሌቶችም ጠቀም ላለው የገንዘብ ሽልማት ከሚያደርጉት ትንቅንቅ ጎን ለጎን በኦሊምፒክ የማራቶን ውድድር ላይ ሀገራቸውን ለመወከል የሚያበቃ ፈጣን ሰዓት ስለማስመዝገብ (ሚኒማ ስለማሟላት) የሚያልሙበት ጭምር ነው፡፡

የዓለም አቀፉ አትሌቲክስ ፌዴሬሽኖች ማሕበር የወርቅ ደረጃ ያለው የዱባይ ማራቶን ውድድር ዳይሬክተር የሆነው ፒተር ኮኔርቶን ‹‹በዘንድሮው ውድድር ላይ ከዚህ ቀደም አሸናፊ የሆኑ ስድስት ኢትዮጵያውያን አትሌቶች ተሳታፊ መሆናቸው ውድድራችን ለረጅም ርቀት ታዋቂ ሯጮች ምን ያህል አስፈላጊ እየሆነ እንደመጣ ያሳያል፡፡ በመወዳደሪያ ስፍራው ላይ እየተመዘገቡ ያሉት ሪኮርዶች በራሳቸው የሚያስተላልፉት መልዕክት ያላቸው ሲሆን አስር አትሌቶች ከ2፡05 በታች የጨረሱበትን የውድድር ታሪክ በማስመዝገቡ ረገድም ግንባር ቀደሞቹ ነበርን፡፡ አሁን ላይ ደግሞ ይህን ቁጥር ወደ 11 ከፍ አድርገነዋል፡፡ በሁለቱም ፆታዎች የሚፎካከሩት አትሌቶችም የአየር ሁኔታው ጥሩ ከሆነ ወጣ ገባ ባልበዛበት የመሮጫ ስፍራችን ላይ ፈጣን ሰዓት ማስመዝገብ እንደሚችሉ በሚገባ ያውቁታል›› ብሏል፡፡

በወንዶቹ ምድብ ያለፈው ዓመት አሸናፊ የሆነው ለሚ ብርሀኑ እና የካቻምናው ባለድል ፀጋዬ መኮንን ፉክክሩን መቀላቀላቸውን ማረጋገጣቸው ቀደም ብለው በውድድሩ ላይ እንደሚካፈሉ ካሳወቁት አየለ አብሽሮ እና ፀጋዬ ከበደ (ሚስተር ኮንሲስተንሲ) ጋር በሚያደርጉት ትንቅንቅ የውድድሩን ድምቀት እና ጥራት ከፍ የሚያደርገው እንደሚሆን ተገልፃ*ል፡፡
የወንዶቹ ውድድር ተጠባቂ ተፎካካሪዎች
ለሚ ብርሀኑ (የ2015 አሸናፊ)

Berhanu wins Dubai Marathon 2015ባለፈው ዓመት ዱባይ ላይ በተሳተፈበት የሕይወት ዘመኑ ሁለተኛ የማራቶን ውድድር በ2፡05፡28 ከእርሱ የተሻለ ልምድ የነበራቸው ተፎካካሪዎቹን ቀድሞ ማሸነፍ የቻለው ለሚ ብርሀኑ ያስመዘገበው ውጤት የራሱን ምርጥ ሰዓትም በአምስት ደቂቃ ያሻሻለበት የነበረ ሲሆን ውጤት ባያመጣም በቤይጂንጉ የዓለም ሻምፒዮና ላይ ኢትዮጵያን ወክሎ ለመወዳደር በቅቷል፡፡ ከ12 ወራት በፊት ደስ የሚል ትዝታን ጥሎለት ያለፈ ትልቅ ድልን የተጎናፀፈው ለሚ ቀነኒሳ በቀለ ጭምር በነበረበት ውድድር ላይ ሳይጠበቅ አሸናፊ መሆን መቻሉ ፈፅሞ ያልጠበቀው ነገር እንደነበር አስታውሶ ስለዘንድሮው ውድድር ጠቅለል ያለ አስተያየቱን ሲሰጥ ‹‹ከቤይጂንግ ዓለም ሻምፒዮና ተሳትፎዬ በኋላ ሌላ ውድድር ስላልነበረኝ ላለፉት አምስት ወራት የዱባይ ማራቶንን በድጋሚ ስለማሸነፍ እያለምኩ በትኩረት ስዘጋጅ ቆይቻለሁ፡፡ በንድሮው ውድድር ላይም በጣም ጠንካራ የሆኑ ተፎካካሪዎች የሚገጥሙኝ ቢሆንም ዓላማዬ ማሸነፍ እና በሪዮ ኦሊምፒክ ኢትዮጵያን ለመወከል የሚያበቃኝን ፈጣን ሰዓት ማስመዝገብ ነው›› ብሏል፡፡

ፀጋዬ መኮንን (የ2014 አሸናፊ)

Tsegaye Asefa Mekonnen Wins Dubai Marathon 2014በ2013 ዓ.ም. በአሯሯጭነት (ፔስ ሜከርነት) ተሳትፎ የነበረ ቢሆንም በማራቶን ይፋዊ የመጀመሪያ ተሳትፎው ሆኖ በተመዘገበለት የ2014ቱ ውድድር ለአሸናፊነት የበቃው ፀጋዬ መኮንንም የራሱ የሆነ ድንቅ ታሪክን ማፃፍ የቻለ ሲሆን በወቅቱ በ18 ዓመቱ በ2፡04፡32 ቀዳሚ ሆኖ የጨረሰበት ሰዓትም ይፋዊ ያልሆነ የዓለም ወጣቶች ሪኮርድ እንደሆነ ተገልፃ*ል፡፡ ከ24 ወራት በፊት ሕይወቱን የቀየረለትን ድል በዱባይ ያስመዘገበው ፀጋዬ ዘንድሮም ሌላ ከፍተኛ ድልን ስለመጎናፀፍ የሚያልም ሲሆን የ2014ቱ ድሉን አስታውሶ ሲናገር ‹‹ዱባይ ላይ ሳሸንፍ ባገኘሁት ሽልማት አዲስ አበባ ውስጥ ቤት ለመግዛት የቻልኩ ሲሆን ወደ ልምምድ የምመላለስበት መኪናም ገዝቻለሁ፡፡ ሙሉ ትኩረቴን በሩጫው ላይ ለማድረግ ስል ትምህርቴን ያቆምኩ ሲሆን በአሁኑ ሰዓት እመራሁት ያለው ሕይወትም ከበዚህ ቀደሙ ሙሉ በሙሉ የተለየ ነው›› ብሏል፡፡

አየለ አብሽሮ (የ2012 አሸናፊ)

Abshero wins in Dubaiከአራት ዓመት በፊት በማራቶን የመጀመሪያ ተሳትፎውን በዱባይ ሲያደርግ የውድድሩ ሪኮርድ በሆነ 2፡04፡23 ሰዓት ለአሸናፊነት በመብቃት ብዙዎችን ያስደመመው አየለ አብሽሮ በአይ.ኤ.ኤ.ኤፍ የወርቅ ደረጃ ያለው ውድድር ላይ በመጀመሪያ ተሳትፎ የተመዘገበ ፈጣኑን ሰዓት ከመያዙም በላይ በወቅቱ ከዓለም የምንግዜም ፈጣን የማራቶን ሰዓቶች ተርታም በአራተኛነት ደረጃ ላይ ለመቀመጥ በቅቶ ነበር፡፡ ከዛ ድሉ በኋላ የለንደን ኦሊምፒክን ጨምሮ በዓለም ዙሪያ በተለያዩ ውድድሮች ላይ ለመሳተፍ የበቃው አየለ በለንደን ማራቶን ሶስተኛ እና አራተኛ ሆኖ ማጠናቀቅ የቻለባቸው ውጤቶቹም ይታወሳሉ፡፡ የታላቅ ወንድሙ ተሰማ አብሽሮን ፈለግ በመከተል ወደሩጫው ዓለም የመጣው አየለ በ2008 የዓለም አገር አቋራጭ ሻምፒዮና ኢትዮጵያን ወክሎ በወጣት ወንዶች የብር ሜዳልያ አሸናፊ ከዓመት በኋላም በተመሳሳይ ውድድር የወርቅ ሜዳልያ ባለቤት መሆን መቻሉም ይታወቃል፡፡ ለጥቂት ዓመታት በትራክ ውድድሮች ላይ ከቆየ በኋላም ፊቱን ወደማራቶን አዙሮ ዘንድሮም ሌላ ትልቅ ድልን በሚያልምበት የዱባዩ ውድድር ድንቅ ጅማሮን አድርጓል፡፡ በ2012 የዱባይ ማራቶን ውድድሩን ሲያሸንፍ በዳውንታውን ዱባይ የጨረሰው አየለ ዘንድሮ በለስ የሚቀናው ከሆነ ውድድሩን የሚያጠናቅቀው በዱባይ ፖሊስ አካዳሚ አቅራቢያ ይሆናል፡፡
ፀጋዬ ከበደ (በዱባይ የመጀመሪያ ተሳትፎውን የሚያደርግ)

Tsegaye_Kebedeበማራቶን የቤይጂንግ ኦሊምፒክ እና የበርሊን ዓለም ሻምፒዮና የነሐስ ሜዳሊያ ባለቤቱ ፀጋዬ በ2016ቱ የዱባይ ማራቶን ውድድር ላይ ከፍተኛ ተጠባቂነት ካላቸው አትሌቶች ግንባር ቀደሙ ሲሆን የ2010 እና 2013 ለንደን ማራቶን አሸናፊው ከዚህ በተጨማሪም በፓሪስ፣ ፉኩካ እና ቺካጎ ማራቶን ውድድሮች ላይ በተቀዳጃቸው ድሎች ይታወቃል፡፡ ፀጋዬ ዘንድሮ በሚሰጠው የሽልማት ገንዘብ የዓለማችን ሀብታሙ ውድድር ተብሎ በሚጠራው የዱባይ ማራቶን ላይ ለመፎካከር ወደተባበሩት አረብ ኤምሬትስ የሚያቀናው ከአሸናፊነቱ በተጨማሪ ለሪዮ ኦሊምፒክ ተሳትፎ የሚያበቃውን ሚኒማ ማሟላትንም እያለመ ይሆናል፡፡ በ2012 የቺካጎ ማራቶንን ያሸነፈበት 2፡04፡38 የራሱ ምርጥ ሰዓት ሆኖ የተመዘገበለት ፀጋዬ በ2013 ዓ.ም. በኒው ዮርክ ማራቶን ሁለተኛ ሆኖ ማጠናቀቁን ተከትሎም ዳጎስ ያለ የገንዘብ ሽልማት የሚያስገኘው የወርልድ ማራቶን ሜጀርስ አሸናፊ መሆኑም ይታወሳል፡፡ የዱባይ ማራቶን ዳይሬክተር ፒተር ኮኔርቶን ‹‹ባለፉት ጥቂት ዓመታት ከዓለማችን ታዋቂ እና ወጥ አቋም ያላቸው የማራቶን ሯጮች አንዱ የሆነው ፀጋዬ ከበደ የኦሊምፒክ ጨዋታዎች ውድድር በሚደረግበት ዓመት በእኛ ውድድር ላይ ለመሳተፍ በመምረጡ በጣም ደስ ብሎናል›› ያለ ሲሆን ‹‹ካሉት ተወዳዳሪዎች ጥራት አንፃርም የውድድሩ ሪኮርድ ሊሰበር እንደሚችል ይጠበቃል›› በማለትም አክሏል፡፡

 

የሴቶቹ ውድድር ተጠባቂዎች
ሙሉ ሰቦቃ (የ2014 አሸናፊ)

Mulu Seboka Wins Dubai 2014በዱባይ ማራቶን በተከታታይ ሶስተኛ ተሳትፎዋን ለማድረግ በዝግጅት ላይ የምትገኘው ሙሉ ሰቦቃ በ2014 አሸናፊ የነበረች ሲሆን በ2015 አምስተኛ ሆና ስታጠናቅቅም 2፡21፡56 የሆነ የራሷን ምርጥ ሰዓት አስመዝግባለች፡፡ በ2015 ዓ.ም. የወርልድ ማራቶን ሜጀርስ አካል በሆነው ቺካጎ ማራቶን ላይ ባደረገችው የመጀመሪያ ተሳትፎ አምስተኛ ሆና ያጠናቀቀችው ሙሉ ‹‹በ2014 ድል ያደረግኩበት እና በ2015 የራሴን ምርጥ ሰዓት ያስመዘገብኩበት የዱባይ ማራቶን ለእኔ ልዩ ውድድር ነው፡፡ በዘንድሮው ውድድር ላይም መሳተፍ እና የተሻለ ፈጣን ሰዓት ማስመዝገብ የምፈልግ ሲሆን ከቺካጎው ውድድሬ በኋላም ትኩረቴን በሙሉ በዱባዩ ውድድር ላይ አድርጌ እየሰራሁ ነው›› ብላለች፡፡

ትርፊ ፀጋዬ (የ2013 አሸናፊ)

TIRFI TSEGAYEትርፊ ፀጋዬ በ2013 ለመጀመሪያ ግዜ የተሳተፈችበትን የዱባይ ማራቶን በ2፡23፡23 በአሸናፊነት መጨረስ የቻለች ሲሆን በመካከለኛ ምስራቅ ትልቁ የጎዳና ላይ ሩጫ 16ኛ ውድድር ላይም ሌላ ድል ለመቀዳጀት ትፎካከራለች፡፡ በ2008 በፖርቶ፣ በ2012 በፓሪስ፣ በ2014 በቶኪዮ እና በበርሊን የማራቶን ውድድሮች ላይም ማሸነፍ የቻለችው ትርፊ 2፡20፡18 የሆነ የራሷ ምርጥ ሰዓት ያላት ሲሆን በዘንድሮው የዱባይ ማራቶን ውድድር የአሸናፊነቱ የቅድሚያ ግምት ተሰጥቷታል፡፡

ማሚቱ ዳስካ (የ2010 አሸናፊ)

Daska_MarituFV-Dubai10በ2010 ዓ.ም. የዱባይ ማራቶን አሸናፊ ከሆነች ወዲህ የራሷን ምርጥ ሰዓት በ2011 የፍራንክፈርት ማራቶንን ስታሸንፍ ወደ 2፡21፡59 ዝቅ ማድረግ የቻለች ሲሆን ባለፈው መስከረም ወር በተከናወነው የመላው አፍሪካ ጨዋታ ላይም በግማሽ ማራቶን የወርቅ ሜዳልያ አሸናፊ መሆኗ ይታወቃል፡፡
ከላይ ከተዘረዘሩት አትሌቶች ውጪም ሌሎች ኢትዮጵያውያን እና ኬንያውያን አትሌቶች በውድድሩ ላይ ብርቱ ተፎካካሪ ሆነው ሊቀርቡ እንደሚችሉ እና ከተጠበቁት ውጪ የሆኑ አትሌቶችም ውድድሩን በበላይነት ሊጨርሱ የሚችሉበት ዕድል እንደሚኖር ይታመናል፡፡

በቤይጂንጉ የዓለም ሻምፒዮናም የኢትዮጵያን የማራቶን ቡድን በአሰልጣኝነት ከመሩት አንዱ የሆነውና በ2016 ዱባይ ማራቶን ላይ የሚሳተፉትን አራት ታዋቂ ኢትዮጵያውያን አትሌቶች በማሰልጠን ላይ የሚገኘው ገመዱ ደደፎ አትሌቶቹ በመጪው ሳምንት ለሚደረገው ውድድር እያደረጉት ያለው ዝግጅት በጥሩ ሁኔታ እየሄደ እንደሚገኝ ተናግሯል፡፡ በዘንድሮው ውድድር በሁለቱም ፆታዎች በእርሱ ስር የሚሰለጥኑ ስድስት አትሌቶች እንደሚወዳደሩ የጠቀሰው ገመዱ ‹‹ሁሉም አሰልጣኝ ልምምድ የሚያሰራው አትሌቱ የሚገባበትን ውድድር እንዲያሸንፍ በማለም ጭምር እንደመሆኑ እኔም ከአትሌቶቼ ሁሌም የምጠብቀው ውጤት የአሸናፊነቱን ደረጃ መውሰድ ነው፡፡ ለዘንድሮው ውድድር በወንዶች ልምድ ያላቸውና ያለፉትን ሁለት ውድድሮች በአሸናፊነት የጨረሱት ለሚ ብርሀኑ እና ፀጋዬ መኮንን በሴቶችም ከዚህ በፊት በዱባይ የአሸናፊነት ተሞክሮው ያላቸው ትርፊ ፀጋዬ እና ማሚቱ ዳስካ እንዲሁም በማራቶን የመጀመሪያ ተሳትፏቸውን የሚያደርጉት መስፍን ተሾመ እና አማኔ በሪሶ ከእኔ ጋር በጥሩ ሁኔታ እየተዘጋጁ ይገኛሉ›› ብሏል፡፡

ከስያሜ ስፖንሰሩ ስታንዳርድ ቻርተርድ በተጨማሪ በዱባዩ ልዑል ሼክ ሀምዳን ቢን ሞሐመድ ቢን ራሺድ አል ማክቱም፣ በዱባይ ስፖርት ካውንስል፣ አዲዳስ፣ ዱባይ አይ 103.8 ኤፍ.ኤም፣ ዱባይ ሆልዲንግስ፣ ዱባይ ፖሊስ እና ዘ አርቲኤ ድጋፍ ሰጪነት የሚዘጋጀው የዱባይ ማራቶን በሶስት የተለያዩ ውድድሮቹ ወደ 30000 የሚሆኑ ሯጮችን እንደሚያሳትፍ የሚጠበቅ ሲሆን በ10 ኪ.ሜ. የጎዳና ላይ ውድድር እና በ4 ኪ.ሜ. ከሚደረገው ሩጫ በተለየ መልኩም ጠቀም ያለ የገንዘብ ሽልማት የሚያስገኘውና ታዋቂ አትሌቶችን የሚያፎካክረው የማራቶን ውድድሩ ከፍ ያለ ትኩረት የሚሰጠው ነው፡፡ በዱባይ ማራቶን በሁለቱም ፆታዎች ከአንደኛ እስከ አስረኛ ባለው ደረጃ ውስጥ የሚያጠናቅቁ አትሌቶች በቅደም ተከተላቸው መሰረት ከ100 ሺህ እስከ 8 ሺህ ዶላር ሽልማት የሚያገኙ ሲሆን የዓለም ሪኮርድ መስበር የቻለም ተጨማሪ የ100 ሺህ ዶላር ጉርሻ ያገኛል፡፡

በዚህ ውድድር ላይ ከ2004 ዓ.ም ወዲህ በወንዶች ከአስራ ሁለቱ ዘጠኙ በሴቶች ከአስራ ሁለቱ አስራ አንዱ አሸናፊዎች ኢትዮጵያውያን አትሌቶች ሲሆኑ በወንዶች ከ2012 በሴቶች ከ2007 ዓ.ም አንስቶም ኢትዮጵያውያኑ አትሌቶች የሌላ ሀገር አትሌቶችን ጣልቃ ሳያስገቡ በተከታታይ በማሸነፍ ላይ ይገኛሉ፡፡

Continue Reading
Click to comment

Leave a Reply

Your email address will not be published.

Articles

የቶኪዮ 2020 ኦሊምፒክ የኢትዮጵያ የአትሌቲክስ ተሳትፎ ድህረ ምልከታ

Published

on

Medal Winners

በቶኪዮ 2020 ኦሊምፒክ በወረቀት ደረጃ ከውድድሩ መጀመር በፊት ቡድኑ ባመዛኙ በጥሩ ብቃት ላይ የሚገኙ ወጣት አትሌቶችን ስላካተተ ቢያንስ የለመድናቸውን ሁለት ወይም ሶስት የወርቅ ሜዳልያ ድሎች እንደማያሳጣን ተስፋ አድርጌ ነበር፡፡ ሆኖም የሜዳ ላይ ውጤቱ እንደተጠበቀው ሳይሆን ቀርቷል፡፡ ኢትዮጵያ በውጤታማነቷ በምትታወቅበት የአትሌቲክስ ፉክክር በአንድ የወርቅ፣ አንድ የብር፣ እና ሁለት የነሐስ በድምሩ በአራት ሜዳልያዎች ከዓለም 14ኛ ከአፍሪካ 3ኛ ደረጃን ይዛ ጨርሳለች፡፡ ይህም ሁሌም ለአፍሪካ የበላይነት ከምንፎካከራት ኬንያ ጋር ያለን ልዩነት ይበልጥ እንዲሰፋ አድጎታል፡፡ ከቅርብ ግዜ ወዲህ ሌላኛዋ የምስራቅ አፍሪካ ተቀናቃኛችን እየሆነች ከመጣችው ኡጋንዳም አንሰን እንድንገኝ አድርጎናል፡፡ የቶኪዮ ኦሊምፒክ በአትሌቲክሱ ከ1992ቱ የባርሴሎና ኦሊምፒክ ወዲህ ኢትዮጵያ ዝቅተኛ የሜዳልያ ስኬት ያስመዘገበችበትም ሆኖ አልፏል፡፡

አሉታዊ ጎኖች
ቶኪዮ የኢትዮጵያ አትሌቲክስ ውጤታማነት ፈር ቀዳጅ የሆነው ታላቁ አትሌት ሻምበል አበበ ቢቂላ በ1964 ዓ.ም. በተከታታይ ሁለተኛ የኦሊምፒክ ማራቶን ድሉን የተቀዳጀባት ከተማ ናት፡፡ እናም በቶኪዮ ከተማ በተከናወነው የኦሊምፒክ ውድድር የኢትዮጵያ ልዑካን ቡድን የሱን ክብር የሚያጎሉባቸውን ነገሮች ያደርጋሉ ብዬ ጠብቄ ነበር፡፡ የሆኑት ነገሮች ግን በተለይ በቡድኑ አስተዳዳሪዎች በኩል ፍፁም ኃላፊነት የጎደለውና ከጠበቅኩት በተቃራኒው ነበር፡፡ የኢትዮጵያ አትሌቲክስ ፌዴሬሽን እና የኢትዮጵያ ኦሊምፒክ ኮሚቴ ከአትሌቶች ምርጫ አንስቶ በቡድኑ የዝግጅት ወቅት በተካረረ ውዝግብ ውስጥ ነበር የከረሙት፡፡ የኦሊምፒክ ቡድኑን የማዘጋጀት እና የመምራት የጋራ ኃላፊነት የነበረባቸው ሁለቱ አካላት ይባስ ብለው ውዝግቡን ቶኪዮ ድረስ ይዘውት ሄደዋል፡፡ ይህ ሁሉ ሲሆን ሁለቱን አካላት በማቀራረብ በትልቁ ውድድር ላይ ያለንን ተሳትፎ እንከን አልባ ማድግ የሚጠበቅባቸውም ተመልካች ከመሆን የዘለለ ሚና አልነበራቸውም። የውዝግቡ አሉታዊ ትሩፋት በአትሌቶች ስነልቦና እና በአጠቃላይ የቡድኑ ውጤት ላይ የበኩሉን ተፅዕኖ ሳያሳርፍ እንዳላለፈ አያጠራጥርም፡፡

እንደ አለመታደል ሆኖ በቶኪዮ ኦሎምፒክ የኢትዮጵያን ልዑካን የመምራት ትልቁ ኃላፊነት የተሰጣቸው ሰዎች ኃላፊነት የጎደላቸው ነበሩ። የስፖርቱ አስተዳደሪዎች ትላልቅ ዓለም አቀፍ ውድድሮች በመጡ ቁጥር በአትሌቶች ምርጫ ዙሪያ የነበረውን ውዝግብ እንዲያቆሙልን እመኝ ነበር። ጭራሽ እራሳቸው ችግር ፈጣሪ ሆነው መገኘታቸው አስደንጋጭ እና አሳሳቢ ጉዳይ ነው፡፡ በመሮጫ መም ወይም በጎዳና ላይ በሚደረጉ ውድድሮች መሸነፍን በስፖርቱ ውስጥ ማሸነፍ እና መሸነፍ ያሉ የነበሩ እና ወደፊትም የሚኖሩ ነገሮች ስለሆኑ በፀጋ መቀበል ይቻላል፡፡ ተወዳዳሪዎቹ ውጤታማ እንዲሆኑ የስነልቦና ጥንካሬን ሊፈጥሩላቸው የሚገቡ ኃላፊዎች የእርስ በርስ ሽኩቻ ተቃራኒውን አሉታዊ ተፅዕኖ ሲያሳርፍ ማየት ግን ፍፁም ተቀባይነት የለውም፡፡ ለነገሩ ከስፖርቱ እድገት ይልቅ የፖለቲካ ግዴታቸው የሚያስጨንቃቸው የስፖርት አመራሮች በበዙባት ሀገር ስፖርቱ እንዲህ የማንም መጫወቻ ሲሆን ማየት አዲስ ነገር አይደለም፡፡  

የስፖርት አመራሮች ከፖለቲካ ተፅዕኖ ነፃ ሆነው ትኩረታቸውን ስፖርቱን በማስፋፋቱ እና ማሳደጉ ላይ አድርገው የሚሰሩ ስለስፖርቱም በቂ እውቀት እና ፍቅሩ ያላቸው ቢሆኑ መልካም ነው፡፡ ለቦታው በሚመጥን እና ኃላፊነቱን በአግባቡ መወጣት በሚችል የስፖርት አመራር የሚመራ የስፖርት ተቋምን መገንባት በተመሳሳይ ሰዓት የሀገር ግንባታን የሚደግፉ ሶስት ነገሮችን ስኬታማ ያደርጋል፡፡ በስፖርት ጤናውን የሚጠብቅ ማሕበረሰብ በመፍጠር በጤናው ሴክተር ላይ የሚኖረውን ጫና ይቀንሳል፣ በሀገር ገፅታ ግንባታ እና በኢኮኖሚው ዕድገት ላይም የበኩሉን ከፍተኛ አስተዋፅኦ ያደርጋል፡፡ በቶኪዮ ላይ የተመለከትናቸው የሀገርን ክብር ዝቅ ያደረጉ ግዴለሽነቶች ተገቢው ትኩረት ተሰጥቷቸው ሊታዩና አጥፊዎቹ ሊጠየቁበት ይገባል፡፡ በመጪዎቹ ዓመታት በሚጠብቁን ዓለም አቀፍ ውድድሮች ላይም የቶኪዮ ኦሊምፒኩን አይነት ሀፍረት እንዳይገጥመን ከወዲሁ ለችግሮቹ መፍትሔ መፈለግ አለበት፡፡

ባለፉት ዓመታት ኦሊምፒክ በመጣ ቁጥር በልዑካን ቡድኑ ውስጥ እየተካተቱ በሕዝብ ገንዘብ የሚዝናኑት የኦሊምፒክ ቱሪስቶች ጉዳይ ዘንድሮም ያልተቀረፈ ችግር ሆኖ ተስተውሏል፡፡ ከሌላው ግዜ በተለየ መልኩ ተጠባባቂ አትሌቶችን ይዞ መጓዝ ይጠይቅ በነበረው ውድድር ላይ አትሌቶቹን ትቶ ምንም የማይሰሩ ሰዎችን ይዞ መሄድ ትልቅ ቀልድ ነው፡፡  

ከሜዳ ውጭ የነበረው ውዝግብ ዋነኛ የትኩረት ማዕከል የነበረ መሆኑ በሜዳ ላይ የነበሩብንን ድክመቶች ሊያስረሳንም አይገባም፡፡ ስድስት የጎዳና ላይ ተወዳደሪዎቻችን እና አንድ የመም ተወዳዳሪ ውድድራቸውን ማቋረጣቸው በቶኪዮ ከታዩት ደካማ ጎኖቻችን መካከል የሚጠቀስ ነው፡፡ ችግሩ በዚህ ምክንያት ነው የተከሰተው ብሎ ለይቶ ለመናገር ባይቻልም ብዙ ግዜ ሲፈትነን ለሚስተዋለው የሞቃታማ ቦታ ውድድር የምናደርጋቸው ዝግጅቶችን መለስ ብሎ መመልከትን የሚጠይቅ ይመስለኛል፡፡ የተጎዳች አትሌትን ወደውድድር እንድትገባ ማድረግ እና በሁለት ደቂቃ ውስጥ ለማቋረጥ መገደዷም የአትሌቶች የጤና ክትትል ላይ ክፍተት እንዳለ የጠቆመን ክስተት ነው፡፡

የኢትዮጵያ ኦሊምፒክ ቡድን ወደውድድር ስፍራው ካቀናበት ግዜ ጀምሮ በቶኪዮ ምንም አይነት ቡድኑን የተመለከቱ ይፋዊ ጋዜጣዊ መግለጫዎች ወይም ፕሬስ ሪሊዞች አልነበሩም፡፡ ይህም እንደተለመደው የሕብረተሰቡን እና የመገናኛ ብዙሀንን ስለቡድኑ ቀጥተኛ መረጃ የማግኘት መብት የገደበ ነበር፡፡ ጋዜጠኞችም ሚዛናዊ ሆኖ ከመዘገብ ይልቅ ጎራ ለይተው ቃላት መወራወራቸው የህዝብን ትክክለኛ መረጃ የማግኘት መብት የነፈገ ነው፡፡ 

አዎንታዊ ጎኖች
ሰለሞን ባረጋ በወንዶች 10,000 ሜትር ወርቅ፣ ለሜቻ ግርማ በወንዶች 3000 ሜትር መሰናክል ብር፣ ጉዳፍ ፀጋዬ በሴቶች 5000 ሜትር ነሐስ፣ እና ለተሰንበት ግደይ በሴቶች 10,000 ሜትር ነሐስ ማስመዝገብ መቻላቸው የሚደነቅ ስኬት ነው፡፡

የመጪው ትውልድ አካል የሆኑት ተስፈኞቹ መቅደስ አበበ፣ ፍሬወይኒ ሀይሉ፣ በሪሁ አረጋዊ እና ጌትነት ዋለን ጨምሮ አምስት አትሌቶች ለሜዳሊያ የቀረበ የአራተኛነት ደረጃን ይዘው ማጠናቀቅ መቻላቸውም መልካም ነው፡፡ በተለይ ወጣቶቹ ያስመዘገቡት ውጤት በመጪዎቹ ዓመታት ተገቢውን ድጋፍ ካገኙ የምንጓጓለትን ድል ሊያስገኙልን እንደሚችሉ ያመላከተን ነው፡፡

የሀብታም አለሙ በኢትዮጵያ የኦሊምፒክ ተሳትፎ ታሪክ በሴቶች 800 ሜትር ለመጀመሪያ ግዜ ለፍፃሜ ተወዳዳሪነት መብቃት ምንም እንኳ በፍፃሜው የሜዳልያ ድል ባይቀናትም በአዎንታዊ ጎን ሊጠቀስ የሚችል ስኬት ነው፡፡

ከአንደኛ እስከ ስምንተኛ ደረጃን ይዘው ላጠናቀቁ አትሌቶች በሚሰጥ ነጥብ ድምር መሰረት በወጣው የነጥብ (ፕሌስመንት) ደረጃ ሰንጠረዥ ላይ በ64 ነጥብ ዘጠነኛ ሆነን ማጠናቀቃችንም እሰየው የሚያስብል ነው፡፡

በቶኪዮ ኦሊምፒክ ከአራተኛ እስከ ስምንተኛ ባሉት ደረጃዎች ውስጥ አጠናቀው ነጥብ ያስገኙ እና የዲፕሎማ ተሸላሚ የሆኑት አትሌቶች፡-
4ኛ – ፍሬወይኒ ሀይሉ – በሴቶች 1500 ሜትር
4ኛ – መቅደስ አበበ – በሴቶች 3000 ሜትር መሰናክል
4ኛ – ሮዛ ደረጀ – በሴቶች ማራቶን
4ኛ – በሪሁ አረጋዊ – በወንዶች 10,000 ሜትር
4ኛ – ጌትነት ዋለ – በወንዶች 3000 ሜትር መሰናክል
5ኛ – እጅጋየሁ ታዬ – በሴቶች 5000 ሜትር
6ኛ – ሀብታም አለሙ – በሴቶች 800 ሜትር
6ኛ – ሰንበሬ ተፈሪ – በሴቶች 5000 ሜትር
8ኛ – ዮሚፍ ቀጄልቻ – በወንዶች 10,000 ሜትር
8ኛ – ዘርፌ ወንድማገኝ – በሴቶች 3000 ሜትር መሰናክል

  • የአትሌቲክስ የነጥብ ደረጃ ሰንጠረዥ ከአንደኛ እስከ ስምንተኛ ባሉት ደረጃዎች ውስጥ የሚያጠናቅቁ አትሌቶች በሚያስመዘግቡት ነጥብ ድምር መሰረት የሚወጣ ሲሆን የነጥብ አሰጣጡም ለአንደኛ ደረጃ 8 ነጥብ፣ ለሁለተኛ ደረጃ 7 ነጥብ፣ ለሶስተኛ ደረጃ 6 ነጥብ፣ ለአራተኛ ደረጃ 5 ነጥብ፣ ለአምስተኛ ደረጃ 4 ነጥብ፣ ለስድስተኛ ደረጃ 3 ነጥብ፣ ለሰባተኛ ደረጃ 2 ነጥብ፣ እና ለስምንተኛ ደረጃ 1 ነጥብ ነው።

ከፊታችን ምን  እየጠበቀን ነው? ምንስ እናድርግ?
ባለፈው ዓመት በዓለም አቀፉ ወረርሺኝ ምክንያት ትልልቅ ዓለም አቀፍ ውድድሮች ለሌላ ግዜ እንዲተላለፉ መደረጉ ይታወቃል፡፡ ሌላ አስገዳጅ ሁኔታ ካልተፈጠረ በስተቀር ቀጣዮቹ አራት ዓመታት በተከታታይ በየዓመቱ ዓለም አቀፍ የአትሌቲክስ ውድድሮች የሚካሄዱባቸው ይሆናሉ፡፡ በ2022 የዓለም ሻምፒዮና፣ በ2023 የዓለም ሻምፒዮና፣ በ2024 የኦሊምፒክ ጨዋታዎች፣ እና በ2025 የዓለም ሻምፒዮና ውድድሮች ይኖራሉ፡፡ በቀጣዩ ዓመት በኢትዮጵያ የቀን አቆጣጠር ከሐምሌ 8 – 17/2014 በዩናይትድ ስቴትስ ኦሪጎን የሚካሄደው የዓለም አትሌቲክስ ሻምፒዮና አዘጋጆች ሙሉ የውድድሩን ፕሮግራም፣ የማራቶን እና የእርምጃ ውድድሮች የሚካሄዱባቸውን ቦታዎች በትላንትናው ዕለት ይፋ አድርገዋል፡፡ የዓለም ሻምፒዮናውን ውድድር በኃላፊነት የሚመራው የኢትዮጵያ አትሌቲክስ ፌዴሬሽንም ከወዲሁ ለዛ ውድድር ተሳትፎ የሚጠበቅበትን አቅዶ መንቀሳቀስ ይኖበርታል፡፡

ከምርጫ ጋር በተያያዘ የሚነሱ ጭቅጭቆችን ለማስቀረት ከወዲሁ ሁሉም አትሌቶች አውቀውት በውስጡ የሚያልፉበትን ገዢ የሆነ የመምረጫ መስፈርት ማዘጋጀት ቀዳሚው ተግባር መሆን አለበት፡፡ የመምረጫ መስፈርት ሁልግዜም በግላዊ ምልከታ እና ፍላጎቶች ላይ በሚመሰረት ምክንያት አነጋጋሪ መሆኑ የማይቀር ነው፡፡ ቢሆንም ባለድርሻ አካላቱን በሙሉ ባሳተፈ መልኩ ውይይት ተደርጎበት ቢወጣ ሁሉንም ገዢ እና ከጭቅጭቅ የፀዳ ሊሆን ይችላል፡፡ እዚህ ላይ በቶኪዮ ኦሊምፒክ ከተከሰቱት ሁኔታዎች አንፃር የሌሎች ሀገሮችንም ተሞክሮዎች በመዳሰስ ነገሩን ሰፋ አድርጎ መመልከት ቢቻል ጥሩ ነው፡፡ ትልልቅ ውድድሮች በመጡ ቁጥር በተደጋጋሚ እንደታዘብነው አንዳንድ አትሌቶች በቡድኑ ውስጥ ለመካተት የሚያደርጉትን ተገቢ ያልሆነ ሙከራም ማቆም አለባቸው፡፡ ከፋም ለማም ስፖርቱን እንዲመራ ኃላፊነት የተሰጠው ተቋም የሚያወጣቸውን መስፈርቶች ማክበርና በዛ ውስጥ ተመራጭ ለመሆን መሞከር ግድ እንደሚላቸውም መዘንጋት የለባቸውም፡፡ ማኔጀሮች እና አሰልጣኞች በተለይ በማራቶን የራሳቸውን አትሌት ለማስመረጥ የሚያደርጓቸው አላስፈላጊ ግፊቶችም ሊያቆሙ ይገባል፡፡

ለውድድሮች የምናደርጋቸውን ዝግጅቶች ጠንካራ እና ደካማ ጎኖች ከውድድሮች በኋላ መገምገም እና መታረም ያለባቸው ነገሮች ካሉ ማረም፡፡ ከፍተኛ ሙቀት በነበረባቸው በለንደን 2012 ኦሊምፒክ ሶስቱም የወንዶች ማራቶን ተወዳዳሪዎቻችን፣ በሞስኮ 2013 የዓለም ሻምፒዮና ሁለቱ የሴቶች ማራቶን ተወዳዳሪዎቻችን፣ በቶኪዮ ኦሊምፒክ ላይ አምስት የማራቶን (ሶስቱም ወንዶች እና ሁለት ሴቶች) ተወዳዳሪዎቻችን እንዲሁም የሴቶች እርምጃ ተወዳዳሪያችን ለማቋረጥ መገደዳቸውን አስተውለናል፡፡ ስለዚህ በጎዳና ላይ ውድድሮች ከባድ ሙቀት ለሚኖርባቸው ቦታዎች እንዴት መዘጋጀት አለብን የሚለው ጉዳይም በደንብ ሊታይ የሚገባው ይመስለኛል፡፡ አንዳንድ የመም (ትራክ) ተወዳዳሪ አትሌቶቻችን የውድድር ዓመቱ ሲጀምር ድንቅ ብቃታቸውን ያሳዩን እና ወደትልቅ ውድድር ሲቃረቡ አቋማቸው እየወረደ ይመጣል፡፡ አሰልጣኞቻቸው ለእነዚህ አይነቶቹ አትሌቶች ወደትልቅ ውድድር ሲቃረቡ ብቃታቸውን እያሳደጉ እንዲሄዱ የሚረዳቸውን የልምምድ ፕሮግራም ቢያዘጋጁላቸው መልካም ነው፡፡ በመካከለኛ ርቀት ውድድሮች ላይ በተለይ በወንዶች አሁንም በከፍተኛ ደረጃ የሚፎካከሩ አትሌቶችን ለማፍራት ጠንክረን መስራት ይጠበቅብናል፡፡

Continue Reading

Articles

የኢትዮጵያውያን አትሌቶች የቶኪዮ ኦሊምፒክ የአትሌቲክስ ማጣሪያ ውድድሮች የመጀመሪያ ሁለት ቀናት

Published

on

በሴቶች 5000 ሜትር የፍፃሜ ውድድር ላይ የሚፎካከሩት ኢትዮጵያውያን አትሌቶች

በቶኪዮ ኦሊምፒክ የመጀመሪያዎቹ ሁለት ቀናት የኢትዮጵያ አትሌቶች የተሳተፉባቸው የወንዶች 3000 ሜትር መሰናክል፣ 800 ሜትር በሁለቱም ፆታዎች፣ እንዲሁም የሴቶች 5000 ሜትር ማጣሪያዎች ሌላኛዎቹ የኢትዮጵያውያን የትኩረት ማዕከል የነበሩ ውድድሮች ናቸው፡፡ ቀጣዩ ዘገባ የኢትዮጵያውያኑን የማጣሪያ ውድድሮች ተሳትፎ እና ውጤቶች አንዲሁም ተጨማሪ መረጃዎችን ይዟል፡፡

የወንዶች 3000 ሜትር መሰናክል

በአትሌቲክስ ውድድሩ የመክፈቻ ቀን (ዓርብ ሐምሌ 23/2013) ጠዋት ላይ በተካሄደው የወንዶች 3000 ሜትር መሰናክል ማጣሪያ ከተሳተፉት ሶስት ኢትዮጵያውያን አትሌቶች መካከል ከምድብ አንድ ለሜቻ ግርማ (8፡09.83) በአንደኛነት፣ ከምድብ ሁለት ጌትነት ዋለ (8፡12.55) በሁለተኛነት ለፍፃሜው ሲያልፉ በምድብ ሶስት የተወዳደረው ታደሰ ታከለ (8፡24.69) ስምንተኛ ወጥቶ ለፍፃሜው ሳያልፍ ቀርቷል፡፡ ለሜቻ ጃፓናዊው ሚዩራ ዩጂን እና ኬንያዊው ቤንጃሚን ኪይገንን በማስከተል ከምድቡ ያሸነፈበት 8:09.83 በኦሊምፒክ የማጣሪያ ውድድሮች ላይ የተመዘገበ የምንግዜውም ፈጣን ሰዓት ሆኗል፡፡ የወንዶች 3000 ሜትር መሰናክል የፍፃሜ የሜዳልያ ፉክክር በዋናነት በኬንያውኑ ቤንጃሚን ኪገን እና አብራሀም ኪቢዎት፣ በኢትዮጵያውያኑ ለሜቻ ግርማ እና ጌትነት ዋለ እንዲሁም በሞሮኳዊው ሶፊያን ኤል ባካሊ መካከል እንደሚሆን ይጠበቃል፡፡

ኢትዮጵያ በወንዶች 3000 ሜትር መሰናክል በ1980ው የሞስኮ ኦሊምፒክ በሻምበል እሸቱ ቱራ አማካይነት ካስመዘገበችው የነሐስ ሜልያ ድል ወዲህ በርቀቱ በወንዶች ምንም አይነት የኦሊምፒክ ሜዳልያ ድል የላትም፡፡ ሆኖም ከቅርብ ግዜ ወዲህ እየታዩ የመጡ መሻሻሎች እና በዶሀው የዓለም ሻምፒዮና ላይ የተመዘገበው የብር ሜዳልያ ድል በቶኪዮም ሌላ ሜዳልያን ተስፋ እንድናደርግ ያነሳሳን ሆኗል፡፡ ዘግይቶ የተሰላፊ አትሌቶች ለውጥ ከተደረገባቸው ርቀቶች አንዱ በሆነው የወንዶች 3000 ሜትር መሰናክል በተጠባባቂነት የተመዘገበውና በዋናነት በ5000 ሜትር እንደሚወዳደር ይጠበቅ የነበረው ጌትነት ዋለ ወደመጀመሪያ ተሰላፊነት የመጣ ሲሆን ኃይለማሪም አማረ በመጨረሻ ሰዓት በለሜቻ ግርማ መተካቱም አነጋጋሪ የሆነ ሌላኛው ለውጥ ነው፡፡ ጌትነት በ3000 ሜትር መሰናክልም ጠንካራ ተፎካካሪ አትሌት ሲሆን በዶሀ የዓለም ሻምፒዮና ላይ አራተኛ ሆኖ ማጠናቀቅ ችሏል፡፡ በፍፃሜው ውድድር በ2019 የርቀቱ የዳይመንድ ሊግ ሻምፒዮን ጌትነት ዋለ እና በወቅቱ የዓለም ሻምፒዮና የብር ሜዳሊስት ለሜቻ ግርማ የሚወከለው የኢትዮጵያ ቡድን በቶኪዮ የኬንያውያኑን የበላይነት ለመግታትና አዲስ የስኬት ታሪክ ለማፃፍ እንደሚበቃ ተስፋ ተጥሎበታል፡፡                     

በ1984 በሎስ አንጀለስ ከተከናወነው የኦሊምፒክ ውድድር አንስቶ በተከታታይ በዘጠኝ የኦሊምፒክ ውድድሮች ወይም ላለፉት 36 ዓመታት የኦሊምፒክ የወንዶች 3000 ሜትር መሰናክል የወርቅ ሜዳልያ ድል በኬንያውያን ቁጥጥር ስር ይገኛል፡፡ በዓለም ሻምፒዮናም ተመሳሳይ የበላይነት ያላቸው ኬንያውያን ከ17 የዓለም ሻምፒዮና ውድድሮች በ14ቱ የወርቅ ሜዳልያው አሸናፊዎች ናቸው፡፡ ሆኖም ከሁለት ዓመት በፊት በዶሀው የዓለም ሻምፒዮና ላይ ከኢትዮጵያውያን እና ከሞሮኮ አትሌቶች የገጠማቸው ተግዳሮት ለመሸነፍ እጅግ አቅርቧቸው የነበረ መሆኑ አይዘነጋም፡፡ በአንድ ማይክሮ ሰከንድ ልዩነት አሸናፊነታቸውን ባረጋገጡበት በዶሀው ውድድር የተፈታተኗቸው ኢትዮጵያዊው ለሜቻ ግርማ እና ሞሮኳዊው ሶፊያን ኤል ባካሊ በቶኪዮው ፍፃሜ ለሌላ ብርቱ ፉክክር እየጠበቋቸው ይገኛሉ፡፡ ባለፉት ሁለት የዓለም ሻምፒዮናዎች በቅደም ተከተል የብር እና የነሐስ ሜዳልያን ያገኘው ሞሮኳዊው ሶፊያን ኤል ባካሊ በቶኪዮ ከሚወዳደሩት በሙሉ የላቀና 7፡58.15 የሆነ የራሱ ምርጥ ሰዓት ያለው ነው፡፡

ኬንያ በቶኪዮ ያለፈው ውድድር ሻምፒዮንነቱን ክብር የሚያስጠብቅላትን አትሌት ይዛ መቅረብ ሳትችል ቀርታለች፡፡ ከአምስት ዓመት በፊት በሪዮ የኦሊምፒክ እንዲሁም ከሁለት ዓመት በፊት በዶሀ የዓለም ሻምፒዮን የሆነው ኮንሰስለስ ኪፕሩቶ ባለፈው ወር በኬንያ የኦሊምፒክ ምርጫ ውድድር ላይ ውድድሩን ባለማጠናቀቁ የኦሊምፒክ ሻምፒዮንነት ክብሩን ለማስጠበቅ በቶኪዮ አልተገኘም፡፡ ስለዚህ አሁን የረጅም ግዜ የበላይነታቸውን የማስጠበቅ ኃላፊነቱ በ2019ኙ የዶሀ የዓለም ሻምፒዮና ላይ በቅደም ተከተል ስድስተኛ እና ሰባተኛ ሆነው ባጠናቀቁት ቤንጃሚን ኪገን እና አብራሀም ኪቢዎት ላይ ወድቋል፡፡  

የሴቶች 800 ሜትር

ከአትሌቲክሱ የጀመሪያ ቀን የጠዋት መርሀግብሮች አንዱ በነበረው የሴቶች 800 ሜትር ማጣሪያ በምድብ ሶስት በአሜሪካዊቷ አቲንግ ሙ ተቀድማ በ2 ደቂቃ ከ01.20 ሰከንድ ሁለተኛ የወጣችው ሀብታም አለሙ ለግማሽ ፍፃሜው ያለፈች ሲሆን በሁለተኛው ቀን ምሽት ላይ በተካሄደው የግማሽ ፍፃሜ ውድድር ላይም በአሜሪካዊቷ አቲንግ ሙ ተቀድማ በ1:58.40 ሁለተኛ በመሆን በኦሊምፒክ የውድድር ታሪክ ለመጀመሪያ ግዜ በርቀቱ ለፍፃሜ ውድድር የበቃች ኢትዮጵያዊት ሆናለች፡፡ ሀብታም ከውድድሩ በኋላ በቶኪዮ ለሚገኘው ባልደረባችን አብይ ወንድይፍራው በሰጠችው አጭር ቃል ‹‹ውድድሩ ትንሽ ፈታኝ ነበር ነገር ግን ለሀገሬ ስል ያለኝን አቅም ሁሉ ተጠቅሜያለሁ፡፡ ክብሩ ይስፋ ለመድኃኒዓለም በመጨረሻም አሪፍ ውጤት ላይ ደርሻለሁ፡፡ ለኦሊምፒክ የፍፃሜ ውድድር ሳልፍ የመጀመሪያዬ ነው፡፡ ከዚህ በፊትም ከኢትዮጵያ ለፍፃሜ የደረሰ ያለ አይመስለኝም እና አሁንም መጨረሻዬን ያሳምርልኝ ነው የምለው›› ብላለች፡፡  

በሴቶች 800 ሜትር የመጀመሪያ ዙር ማጣሪያ በምድብ አራት በ2.01.98 አራተኛ ሆና ያጠናቀቀችው ነፃነት ደስታ ወደ ግማሽ ፍፃሜው መቀላቀል ሳትችል ስትቀር በጀማሪዎች ስም ዝርዝር ላይ ስሟ ተካቶ በምድብ አንድ እንደምትሮጥ ስትጠበቅ የነበረችው ወርቅውሀ ጌታቸው ግልፅ ባልተደረገ ምክንያት ውድድሩን ሳትጀምር ቀርታለች፡፡

የወንዶ 800 ሜትር

የወንዶች 800 ሜትር የመጀመሪያ ዙር ማጣሪያ ላይ የተሳተፈው ኢትዮጵያዊው መለሰ ንብረት ከምድብ ሶስት በ1:47.80 ሰባተኛ ሆኖ በማጠናቀቅ ለግማሽ ፍፃሜው ማለፍ ሳይችል ቀርቷል፡፡ በመሐመድ አማን ስኬቶች በመነቃቃት ላይ የነበረው የወንዶች 800 ሜትር ከቅርብ ግዜ ወዲህ ኢትዮጵያ ሶስት ሰዓት የሚያሟሉ ተወካይ አትሌቶችን ለማግኘት እየተቸገረችበት የምትገኝ ርቀት እንደሆነ እየታየ ነው፡፡ የኦሊምፒክ ሚኒማ ማሟላት የቻለ አንድ አትሌት ብቻ ይዘን የቀረብንበት የቶኪዮ ኦሊምፒክም ይህ ችግር እንዳልተቀረፈ የታየበት ሌላኛው አጋጣሚ ሆኗል፡፡  

የሴቶች 5000 ሜትር ማጣሪያ

በአትሌቲክሱ የመጀመሪያ ቀን ሐምሌ 23/2013 ምሽት ላይ በተደረት የሴቶች 5000 ሜትር ማጣሪያ ላይ የተሳተፉት ሶስቱም ኢትዮጵያውያን አትሌቶች ሐምሌ 26/2013 ምሽት ላይ ለሚደረገው የፍፃሜ ውድድር አልፈዋል፡፡ ከምድብ አንድ ሰንበሬ ተፈሪ (14፡48.31) እና እጅጋየሁ ታዬ (14፡48.52) የኔዘርላንዷ ሲፋን ሀሳን (14፡47.89) እና ኬንያዊቷ አግነስ (14፡48.01) ቲሮፕን ተከትለው በቅደም ተከተል ሶተኛ እና አራተኛ ሆነው ሲያልፉ ከምድብ ሁለት ጉዳፍ ፀጋዬ (14፡55.74) ኬንያዊቷ ሔለን ኦቢሪ (14፡55.77) አስከትላ በአንደኛነት አልፋለች፡፡


ሐምሌ 26/2013 ምሽት ላይ በሚደረገው የሴቶች 5000 ሜትር የፍፃሜ ውድድር ላይ የሚፎካከሩት ኢትዮጵያውያን አትሌቶች

በሄንግሎ በተከናወነው የኢትዮጵያ የኦሊምፒክ ምርጫ ውድድር ላይ ባስመዘገበችው የራሷ ምርጥ 14:13.32 የርቀቱ የወቅቱ ፈጣን አትሌት ሆና ወደ ቶኪዮ ያቀናችው ጉዳፍ ለወርቅ ሜዳልያ ድል ከሚጠበቁት መካከል ናት፡፡ በሄንግሎው ውድድር ላይ ጉዳፍን በመከተል በቅደም ተከተል 14:14.09 እና 14፡15.24 በሆነ ሰዓት የጨረሱት እጅጋየሁ እና ሰንበሬም በዓለም የምንግዜም ምርጥ ዝርዝር ውስጥ የስድስተኛ እና ሰባተኛ ደረጃን ለመያዝ የበቁ ጠንካራ አትሌቶች ናቸው፡፡ የቶኪዮ ኦሊምፒክ የሴቶች 5000 ሜትር ተወዳዳሪዎች ዝርዝር ሶስቱን ኢትዮጵያውያን ጨምሮ ከዓለም የምንግዜም ምርጥ አስር የርቀቱ ሯጮች አምስቱን ያካተተ ነው፡፡ ኬንያውያኑ ሄለን ኦቢሪ እና አግነስ ቲሮፕ ከምንግዜም ምርጥ አስሮቹ ውስጥ የሚካተቱ ሲሆኑ በ12ኛ ደረጃ ላይ የምትገኘው ኔዘርላንዳዊቷ ሲፋን ሀሳንም የቶኪዮውን የፍፃሜ ፉክክር በጉጉት እንዲጠበቅ የምታደርግ ብርቱ አትሌት ናት፡፡

Continue Reading

Articles

ሰለሞን ባረጋ ለአስራ ሶስት ዓመት የራቀንን የወንዶች 10,000 ሜትር ድል በቶኪዮ ወደ ኢትዮጵያ መልሶታል

Published

on

218076583_1010892909482678_1235421043554241523_n

በቶኪዮ ኦሊምፒክ በጉጉት ሲጠበቅ የነበረው የአትሌቲክስ ውድድር በተጀመረ በሁለተኛው ቀን በወንዶች አስር ሺህ ሜትር ኢትዮጵያውያንን እጅግ ያስደስተው ድል በወጣቱ ሰለሞን ባረጋ አማካይነት ተመዝግቧል፡፡   
በ1980 ሞስኮ ላይ ምሩፅ ይፍጠር በርቀቱ ለመጀመሪያ ግዜ የኦሊምፒክ የወርቅ ሜዳልያ ካስገኘ በኋላ ከተደረጉት አስር የኦሊምፒክ የወንዶች 10 ሺህ ሜትር ውድድሮች ኢትዮጵያ አምስቱን በበላይነት ለመጨረስ ችላለች፡፡ የርቀቱ ንጉሶች ሀይሌ ገብረስላሴ እና ቀነኒሳ በቀለ ከ1992 እስከ 2008 ዓ.ም. በአራት ተከታታይ የኦሊምፒክ ውድድሮች ላይ በማሸነፍ የርቀቱ የወርቅ ድል ለኢትዮጵያ ብቻ የተሰጠ እንዲመስለን አድርገውንም ነበር፡፡ ከ2008ቱ የቤይጂንግ ኦሊምፒክ የቀነኒሳ በቀለ ድል በኋላ በተከሰተው የሞ ፋራህ የበላይነት ምክንያት ተመሳሳዩን ድል በቶኪዮ ለማየት 13 ዓመታትን መጠበቅ ግድ ብሎናል፡፡ ላለፉት አስራ ሶስት ዓመታት በጉጉት ስንጠብቀው የቆየነውን የ10 ሺህ ሜትር የኦሊምፒክ ድል በመጨረሻም ሰለሞን ባረጋ በቶኪዮ አጎናፅፎናል፡፡ የሰለሞን የቶኪዮ የወርቅ ሜዳልያ ድል ኢትዮጵያ ካለፉት አስራ አንድ ኦሊምፒኮች በርቀቱ ለስድስተኛ ግዜ የበላይ ሆና እንድትጨርስ ያስቻለም ነው፡፡ ድሉ በቶኪዮ የአትሌቲኪስ ውድድሮች የመጀመሪያው የወርቅ ሜዳልያ ድል ሆኖም ተመዝግቧል፡፡ ሰለሞን ባረጋ በ2018 የበርሚንግሀም የዓለም የቤት ውስጥ ውድድር በ3000 ሜትር እና በ2019 የዶሀ ዓለም ሻምፒዮና ላይ በ5000 ሜትር የብር ሜዳልያ ካገኘ በኋላ በመጀመሪያ የኦሊምፒክ ተሳትፎው ከፍተኛ ክብር የሚሰጠውን የ10,000 ሜትር የወርቅ ሜዳልያ ድል ለማሳካት በቅቷል፡፡

‹‹የ200 ሜትር እና 400 ሜትር አጫጨር የፍጥነት ሩጫ ልምምዶችን ስሰራ ስለነበረ ሁለት ዙር ሲቀር ውድድሩን እንደማሸንፍ ለራሴ ነገርኩት››
ሰለሞን ባረጋ ከቶኪዮው ድል በኋላ

ሰለሞን ባረጋ ከቶኪዮው ድሉ በኋላ በስፍራው ከሚገኘው የስራ ባልደረባችን አብይ ወንድይፍራው ጋር ባደረገው አጭር ቃለ ምልልስ የሚከተለውን ብሏል ‹‹ረጅም ርቀት የእኛ ስፖርት ነው ተብሎ ይታመናል፡፡ ሆኖም በኦሊምፒክ ውድድር ላይ ወርቅ ሜዳልያ ከወሰድን ብዙ ግዜ አልፎናል፡፡ ይህን ነገር ለመጨረሻ ግዜ ያሳካውም ቀነኒሳ ነበረ፡፡ ዛሬ በቶኪዮ ድሉን በማሳካቴ በጣም ደስተኛ ነኝ፡፡ በተለይ ለእኛ ከቶኪዮ ጋር አበበ ቢቂላን የምናስታውስበት ድል ስለሆነ ያንን በማሳካቴም በጣም ተደስቻለሁ፡፡ ዘንድሮ ከኡጋንዳ የዓለም ሪኮርድ የሰበረው ቼፕቴጌይ እና የዓመቱን ፈጣን ሰዓት የሮጠው ኪፕሊሞ ነበሩ፡፡ እናም ውድድሩ በጣም ይፈጥናል ብዬ ነበር የጠበቅኩት ግን አልተሮጠም፡፡ ውድድሩን የጨረስነውም 27 ቤት ነው፡፡ የ200 ሜትር እና 400 ሜትር አጫጨር የፍጥነት ሩጫ ልምምዶችን ስሰራ ስለነበረ ሁለት ዙር ሲቀር ውድድሩን እንደማሸንፍ ለራሴ ነገርኩት፡፡ ኡጋንዳውያኑ አትሌቶች ዛሬ ብዙም አልታገሉም፡፡ አብዛኛውን ሰዓት ከኋላ ነው የቆዩት እና እንደዚህ ይሆናል ብዬ አልጠበቅኩም ነበር፡፡ እነርሱን ካሜራ ላይም እያየኋቸው ስለነበር ስለነሱ ብዙም አልተጨነቅኩም እንደውም ከእነሱ ይልቅ የእኛን ልጆች ነበረ ይወጣሉ ብዬ የጠበቅኩት፡፡ በውድድሩ መሀል ተጠባቂ የሆኑት ኡጋንዳውያን ወደኋላ ቀርተው ሶስተኛው የቡድን አጋራቸው ወደፊት ወጥቶ በሰፊ ልዩነት ሲመራ እኛ እነሱን ስንጠብቅ እሱ አዘናግቶ እንዳያሸንፍ ልዩነቱን ለማጥበብ ሞክሬያለሁ፡፡ ምናልባት እነሱ እኛን ሲጠብቁ አንተ ሂድ ያሉት ነበር የመሰለኝ፡፡ ከዚህ በፊት በእንደዚህ አይነቱ ነገር ዳይመንድ ሊግ ላይ ስለተሸወድኩኝ ያንን እንዳይደግሙ ብዬ ነበረ ልዩነቱን ለማጥበብ የሞከርኩት፡፡ የአሰልጣኜንም ምክር እየሰማሁ ስለነበረ የምሮጠው እና ወደኋላ ተመለስ እያለኝ ስለነበር ወደኋላ ተመልሻለሁ፡፡ የእነርሱ እስትራቴጂ እሱን ወደፊት እንዲወጣ አድርገው እኛን ለማድከም ነበረ፡፡ ከበሪሁን ጋር ስንነጋገር ወደፊት ጠጋ በል እያልኩት ነበረ፡፡ ከበሪሁን ጋር ልምምድም አብረን ነበረ የምንሰራው፡፡ እኔ እንደውም ከአንድ እስከ ሶስት እንወጣለን ብዬ ነበር የጠበቅኩት አጋጣሚ ሆኖ አልተሳካም ነገር ግን ወርቁን ወደኢትዮጵያ በመመለሳችን በጣም ደስተኛ ነን፡፡›› ብሏል፡፡

Continue Reading

Trending