Connect with us

Articles

በኢትዮጵያ ፕሪምየር ሊግ 5ኛ ሳምንት ኢትዮጵያ ቡና የመጀመሪያ ድሉን ሲያገኝ ቅዱስ ጊዮርጊስ ነጥብ ጥሏል

Published

on

coffee-v-sidama

በ2009 የኢትዮጵያ ፕሪምየር ሊግ አምስተኛ ሳምንት ሁለት ከፍተኛ ግምት የተሰጣው ጨዋታዎች አዲስ አበባ ላይ ተደርገው ነበር፡፡ እነዚህም ባልተጠበቀ ሁኔታ በወራጅ ቀጠና ውስጥ የተገኘው ኢትዮጵያ ቡና በሊጉ ጥሩ ጅማሮ በማድረግ ሁለተኛ ደረጃ ላይ የነበረው ሲዳማ ቡናን ያስተናገደበት እና መሪው ቅዱስ ጊዮርጊስ አራተኛ ደረጃ ላይ የነበረው አዳማ ከተማን የገጠመበት ነበሩ፡፡ ቀጣዩ ዘገባ እነዚህን ሁለት ጨዋታዎች ለመዳሰስ ይሞክራል፡፡

ኢትዮጵያ ቡና ከ ሲዳማ ቡና

coffee-v-sidama

ከመጀመሪያዎቹ አራት ጨዋታዎቹ አንዱንም ማሸነፍ ላልቻሉት ኢትዮጵያ ቡና እና አዲሱ አሰልጣኙ ኒቦይሳ ቩቺቼቪች ይህ ጨዋታ የሞት ሽረት ነበር፡፡ ሲዳማ ቡና በበኩሉ ቢያንስ ለጊዜውም ቢሆን የፕሪምየር ሊጉ መሪ ሊሆን የሚችልበትን እድል የሚፈጥርለት ጨዋታ ነበር፡፡ ባለሜዳዎቹ ኢትዮጵያ ቡናዎች ሀሪስተን ኮአሲን በግብ ጠባቂ ስፍራ ሲያሰልፉ፣ አብዱል ከሪም መሀመድ (ቀኝ)፣ ኢኮ ፌቨር፣ ኤፍሬም ወንድወሰን (መሀል) እና አህመድ ረሺድን (ግራ) በተከላካይ ስፍራዎች ተጠቅመዋል፡፡ ጋቶች ፓኖም፣ አማኑኤል ዮሐንስ እና ኤልያስ ማሞ አማካይ ክፍል ላይ እንዲሁም ሳሙኤል ሳኑሚ (ግራ)፣ ሳዲቅ ሴቾ (መሀል) እና ያቡን ዊልያም (ቀኝ) አጥቂ ክፍሉ ላይ 4-3-3 በሚመስል አሰላለፍ ተሰልፈዋል፡፡ ሲዳማዎች በበኩላቸው ለዓለም ብርሀኑ (ግብ ጠባቂ)፣ ሳውሬል ኦልሪስ፣ አንተነህ ተስፋዬ፣ አበበ ጥላሁን እና ሰንደይ ሙቱኩ (ተከላካዮች)፣ ሙሉዓለም መስፍን፣ ፍፁም ተፈሪ፣ ትርታዬ ደመቀ እና ወሰኑ ማዜ (አማካዮች) እንዲሁም ኤሪክ ሙራንዳ እና አዲስ ግደይ (አጥቂዎች) አሰልፈዋል፡፡

ስታዲየሙ በደጋፊዎች ዝማሬዎች ደምቆ ጨዋታውም ሞቅ ብሎ ተጀምሯል፡፡ በመጀመሪያዎቹ ደቂቃዎች ላይ ኳሱ መሀል ሜዳ አካባቢ ሲንከባለል ከቆየ በኋላ 10ኛው ደቂቃ ላይ የጨዋታው የመጀመሪያ ትልቅ ክሰተት ተፈፅሟል፡፡ የኢትዮጵያ ቡናዎች በመልሶ ማጥቃት ወደፊት ሄደው ጋቶች ፓኖም ለያቡን ዊልያም አቀብሎት ያቡን ለአህመድ ረሺድ ሰጥቶት የግራ ተከላካዩ ኳስ ይዞ ወደ ሲዳማ የጎል ክልል ከገባ በኋላ ሳውሬል ኦልሪስን አታሎ ለማለፍ ሲሞክር በሄይቲያዊው ተከላካይ ተጠልፎ በመውደቁ ቡናማዎቹ የፍፁም ቅጣት ምት አግኝተዋል፡፡ ሳሙኤል ሳኑሚ ወደጎል በመቀየርም መሪ አድርጓቸዋል፡፡ ሳኑሚ በቡና ማልያ የመጀመሪያ ጎሉ በመሆኑ ይመስላል ፈንጠዝያው ከፍ ያለ ነበር፡፡ በ16ኛው ደቂቃ ኤልያስ ማሞ በጥሩ መንገድ ኳስ አቀብሎት ሳኑሚን ከግብ ጠባቂው ጋር ብቻ ለብቻ ቢያናኘውም የናይጄሪያዊው አጥቂ ደካማ ሙከራ ከለዓለም እጆች አላለፈም፡፡ ቀጣዩ ክስተት ግን በተቃራኒው ሳኑሚን የሚያስወድስ ነበር፡፡ በ24ኛው ደቂቃ ሳኑሚ ተስፋ ሳይቆርጥ በመሮጥና ኳሷን በማግኘት በመሬት ሴንተር ያደረገውን ዊልያም አግኝቶ አቁሞ እና ተረጋግቶ ለቡድኑ ሁለተኛውን ጎል ማስቆጠር ችሏል፡፡ የሲዳማ የመጀመሪያ ሙከራ በ32ኛው ደቂቃ ወሰኑ ማዜ የመታውን እና በሀሪስተን የተያዘው የቅጣት ምት ነበር፡፡ በ34ኛው ደቂቃ ቡናዎች ወደፊት ሄደው ሳኑሚ በተረከዝ ያቀበለውን ኳስ አማኑኤል ዮሐንስ ወደጎል ሞክሮት በግብ ጠባቂው ተመልሶበታል፡፡ በ37ኛው ደቂቃ ወሰኑ ሌላ ሙከራ ከርቀት አድርጎ በአግዳሚው ላይ ወጥቶበታል፡፡ የመጀመሪያው አጋማሽ በኢትዮጵያ ቡና 2ለ0 መሪነት ተጠናቋል፡፡

ቡድኖቹ ለሁለተኛው ግማሽ ሲመለሱ የሲዳማው አሰልጣኝ አለማየሁ አባይነህ የተጨዋች ቅያሬ አድርገዋል፡፡ አንተነህ ተስፋዬን አስወጥተው በፀጋዬ ባልቻ ተክተውታል፡፡ ቅያሬም ቡድኑን የለወጠ መሽሎ 55ኛ ደቂቃ ላይ ተቀይሮ ገቢው ፀጋዬ በረዥሙ ያቀበለውን ኳስ ፍፁም ተፈሪ ተቆጣጥሮ ለሲዳማ ጎል አድርጎታል፡፡ ከእረፈት መልስ በሁሉ ረገድ በተጋጣሚያቸው የተበለጡት ባለሜዳዎቹ ወዲያውኑ ቅያሬ በማድረግ በሳዲቅ ሴቾ ምትክ ኢያሱ ታምሩን አስገብተዋል፡፡ ከዚህ ቅያሬ በኋላ በተሻለ ጨዋታውን ለመቆጣጠርም ችለዋል፡፡ በ62ኛው ደቂቃ አህመድ ተጠልፌያለሁ ብሎ ሌላ ፍፁም ቅጣት ምት ቢጠይቅም ዳኛውን አላሳመናቸውም፡፡ በ64ኛው ደቂቃ በለዓለም ስህተት ያገኘውን ኳስ አማኑኤል ለሳኑሚ ሊያቀብለው ቢሞክርም ሊያደርሰው አልቻለም፤ ኳሱን ዊልያም አግኝቶ ሲመታም በተከላካዮች ተደርቦ ወጥቶበታል፡፡ በ71ኛው ደቂቃ በመጀመሪያው አጋማሽ ለተጋጣሚዎቹ አበሳ የነበረው ሳኑሚ ተቀይሮ ወጥቶ ሳላምላክ ተገኝ ተክቶታል፡፡ ሳላምላክ ቀኝ ተከላካይ ስፍራውን ይዞም አብዱልከሪም መሀመድ ወደአማካይነት ተዛውሯል፡፡ ሲዳማዎችም በትርታዬ ደመቀ ፋንታ ላኪ ሳኒን አስገብተዋል፡፡ በነዚህ ደቂቃዎች ቡናማዎቹ ጠንክረው የጎል ልዩነቱን ለማስፋት ሙከራዎችን አድርገዋል፡፡ በ73ኛው ደቂቃ አማኑኤል በመሬት የመታውን ለዓለም ሲመልሰው፣ በ76ኛው ደቂቃ እያሱ እና አማኑኤል ያዘጋጁለትን አብዱልከሪም ወደጎል መቶት ለዓለም ይዞበታል፡፡ ከዚያም አማኑኤል ከአብዱልከሪም ያገኘውን ኳስ ሞክሮ አሁንም ለዓለም መልሶበታል፡፡ በ79ኛው ደቂቃ የአብዱልከሪም ሙከራ ወደውጪ ወጥቷል፡፡ በ81ኛው ደቂቃ ሙጀሲድ መሀመድ ኤሪክ ሙራንዳን ተክቶ ገብቷል፡፡ በ83ኛው ደቂቃ ከሳኑሚ መውጣት በኋላ በመሀል አጥቂነት ሲጫወት የነበረው ኤልያስ በመሬት የመታውን ኳስ ግብጠባቂው እንደምንም አውጥቶበታል፡፡ በባከኑ ደቂቃዎች ወንድይፍራው ጌታሁን ኤልያስን ተክቶ ገብቷል፡፡ ጨዋታውም በኢትዮጵያ ቡና የ2ለ1 ድል ተጠናቋል፡፡

ቅዱስ ጊዮርስ ከአዳማ ከተማ

st-george-v-adama

ከሶስት ሳምንታት ፍፁማዊ የድል ጉዞ በኋላ በፋሲል ከተማ የመጀመሪያ ሽንፈታቸውን የቀመሱት ቅዱስ ጊዮርጊስ እና የመጀመሪያ ሁለት ጨዋታዎቻቸውን በማሸነፍ ከጀመሩ በኋላ በሁለት ተከታታይ ጨዋታዎች ከድል የራቁት አዳማ ከተማ ያደረጉት ጨዋታም በጉጉት የተጠበቀ ነበር፡፡

ባለሜዳዎቹ ቅዱስ ጊዮርጊሶች 4-3-3- በሚመስል የቡድን ቅርፅ ሮበርት ኦዳንካራ (ግብ ጠባቂ) ፣ ፍሬዘር ካሳ፣ አስቻለው ታመነ፣ ምንተስኖት አዳነ እና አበባው ቡታቆ (ተከላካዮች)፣ ተስፋዬ አለባቸው፣ አብዱልከሪም እና ምንያህል ተሾመ (አማካዮች) በኃይሉ አሰፋ፣ አቡበከር ሳኒ እና ሰልሀዲን ሰኢድን (አጥቂዎች) አሰልፈዋል፡፡ አዳማዎች በበኩላቸው ጃኮብ ፔንዜ (ግብ ጠባቂ)፣ እሸቱ መና፣ ምኞት ደበበ፣ ተስፋዬ በቀለ እና ሱሌይማን መሀመድ (ተከላካዮች)፣ ፋሲካ አስፋው፣ ብሩክ ቃልቦሬ፣ ዳዋ ሆጤሳ እና ሚካኤል ጆርጅ (አማካዮች) እንዲሁም ታፈሰ ተስፋዬ እና ሙጂብ ቃሲምን (አጥቂዎች) በመጀመሪያ አሰላለፋቸው ተጠቅመዋል፡፡ በጨዋታው የመጀመሪያዎቹ 15 ደቂቃዎች ቅዱስ ጊዮርሶች የተሻሉ የነበሩ ሲሆን በስድስተኛው ደቂቃ በሰልሀዲን ሰኢድ ከዚያም በ15ኛው ደቂቃ በአበባው ቡታቆ ቅጣት ምት አማካይነት ኢላማውን የጠበቀ እና ያልጠበቀ ሙከራዎች አድርገዋል፡፡ ከዚም በ20ኛው ደቂቃ አዳማዎች በታፈሰ ተስፋዬ አማካይነት ያደረጉት ሙከራ በሮበርት ኦዳንካራ ጥረት ጎል ከመሆን ድኗል፡፡ በ36ኛው ደቂቃ አብዱልከሪም በመሬት የመታው ኳስ ሲወጣበት፣ ከደቂቃ በኋላ ምንተስኖት አዳነ ወደፊት ሄዶ ለማግት ያደረገው ጥረት ከሽፎበታል፡፡ ምንተስኖት ጥፋት ተሰርቶብኛል ቢልም የመሀል ዳኛው በአምላክ ተሰማ ጨዋታው እንዲቀጥል አዘዋል፡፡ በ39ኛው እና 40ኛው ደቂቃዎች ላይ ፈረሰኞቹ በተከታታይ በበኃይሉ አሰፋ እና ሰልሀዲን ያደረጓቸው ሙከራዎች በግብ ጠባቂው ተመልሰዋል፡፡ በ42ኛው ደቂቃ ዳዋ ያደረገው ሙከራ በኦዳንካራ ድኗል፡፡ በመጀመሪያው አጋማሽ የባከኑ ደቂቃዎች ላይ ምንያህል ያሻገረውን ኳስ ምንተስኖት ጎል ቢያደርገውም የመስመር ዳኞቹ የጨዋታ ውጪ ባንዲራ አንስተውበታል፡፡ የመጀመሪው አጋማሽም ያለጎል ተጠናቋል፡፡ ሁለቱም ቡድኖች ለሁለተኛው አጋማሽ የተመለሱት የተጨዋቾች ቅያሬዎችን በማድረግ ነበር፡፡ ባለሜዳዎቹ ምንያህልን አስወጥተው በናትናኤል ዘለቀ ሲተኩ፣ እንግዶቹ አዳማዎች በምኞት እና ዳዋ ምትክ አዲስ ህንፃ እና ሲሳይ ቶሊን አስገብተዋል፡፡ ሙጂብ ቃሲምም ከአጥቂነት ወደቀድሞ ቦታው የመሀል ተከላካይነት ተዛውሯል፡፡ የአዳማው አሰልጣኝ አሸናፊ በቀለ ቅያሬዎቹን ካደረጉ በኋላ ቡድኑ በተሻለ መረጋጋት፣ ኳስ መቆጣጠር እና የጎል እድሎችን መፍጠርም ችሏል፡፡ በ56ኛው ደቂቃ ታፈሰ በመሬት የመታው ለጥቂት ወጥቶበታል፡፡ በ65ኛው ደቂቃ አዳነ ግርማ አብዱልከሪምን ተክቶ ገብቷል፡፡ 67ኛው ደቂቃ የጨዋታው ምርጡ አጋጣሚ የተገኘበት ነበር፡፡ ሰልሀዲን የአዳማ የጨዋታ ውጪ ወጥመድን ጥሶ በመግባት ከግብ ጠባቂው ጋር ብቻ ለብቻ ቢገናኝም ኳሱን በአግዳሚው ላይ ሰዶታል፡፡ በ76ኛው ደቂቃ ያስር ሙጌርዋ በተስፋዬ አለባቸው ምትክ ገብቷል፡፡ በ81ኛው ደቂቃ ሲሳይ ቶሊ ከቀኝ ወደመሀል ገብቶ በመሬት የመታው ኳስ ለጥቂት ወጥቶበታል፡፡ በ83ኛው ደቂቃ በኃይሉ ያሻገረውን ኳስ ሰልሀዲን በመቀስ ምት ለመምታት ቢሞክርም አልተሳካትም፡፡ በ84ኛው ደቂቃ አዳነ በመሬት የመታውን ጃኮብ ይዞበታል፡፡ ከዚያም በባከኑ ደቂቃዎች ላይ ታፈሰ አምልጦ ወደጎል ሲገሰግስ ናትናኤል ጥፋት ሰርቶ በማስቀረቱ የተሰጠውን የቅጣት ምት ሱሌይማን በመሬት መትቶት ኦዳንካራ በድንቅ መንገድ ጎል ከመሆን ታድጎታል፡፡ ጨዋታውም ጎል ሳይታይበት ተጠናቋል፡፡

ሌሎች ተጨማሪ ነጥቦች፡-

  • ኢትዮጵያ ንግድ ባንክ አዲስ አበባ ከተማን 2ለ1 ረትቷል፡፡ ለንግድ ባንክ ፒተር ንዋድኬ በፍፁም ቅጣት ምት እና ሳሙኤል ዮሐንስ ጎሎቹን ሲያስቆጥሩ፣ ለአዲስ አበባ ከተማ ዘሪሁን ብርሀኑ አግብቷል፡፡
  • አራት ቀይ ካርዶች (ሶስት ለሀዋሳ) በተመዘዙበት ጨዋታ ሀዋሳ ከተማ እና መከላከያ 2ለ2 ተለያይተዋል፡፡ አራፋት ጃኮ እና ጋዲሴ መብራቴ ለሀዋሳ እንዲሁም ምንይሉ ወንድሙ እና ካርሎስ ዳምጠው ለመከላከያ ጎሎቹን አስቆጥረዋል፡፡
  • ኢትዮ-ኤሌክትሪክ አሁንም ማሸነፍ አልቻለም፡፡ ዳዊት እስጢፋኖስን በሁለት ቢጫ ካርድ ያጡት ኤሌክትሪኮች ከአርባምንጭ ከተማ 1ለ1 ተለያይተዋል፡፡ ፍፁም ገብረማሪያም ለኤሌክትሪክ እና ገብረሚካኤል ያእቆብ ለአርባምንጭ ያስቆጠሩ ተጨዋቾች ናቸው፡፡
  • የወልዲያ ከተማ እና ፋሲል ከተማ፣ የጂማ አባቡና እና ደደቢት እንዲሁም የወላይታ ድቻ እና ድሬዳዋ ከተማ ጨዋታዎች በተመሳሳይ ጎል ያላስተናገዱ ጨዋታዎች ናቸው፡፡
  • ሊጉን ቅዱስ ጊዮርጊስ በ10 ነጥቦች ሲመራ፣ ሲዳማ ቡና በ9 ነጥብ ሁለተኛ ነው፡፡ ደደቢት እና አዳማ ከተማ 8 ነጥቦች አላቸው፡፡ ኢትዮጵያ ቡና በ5 ነጥብ 13ኛ፣ ኤሌክትሪክ፣ ሀዋሳ ከተማ እና ኢትዮጵያ ንግድ ባንክ በ4 ነጥብ የመጨረሻዎቹ ደረጃዎች ላይ ይገኛሉ፡፡
  • የስድስተኛው ሳምንት ጨዋታዎች በሳምንቱ የመጨረሻ ቀናት ይከናወናሉ፡፡ እሁድ በ9 ሰዓት አርባምንጭ ከተማ አዲስ አበባ ከተማን፣ ፋሲል ከተማ ሀዋሳ ከተማን፣ አዳማ ከተማ ወልዲያን፣ ሲዳማ ቡና ቅዱስ ጊዮርጊስን እና ወላይታ ድቻ ኢትዮጵያ ቡናን በየሜዳዎቻቸው ያስተናግዳሉ፡፡ በ10 ሰዓት በድሬዳዋ ስታዲየም ድሬዳዋ ከተማ ኢትዮጵያ ንግድ ባንክን ሲገጥም፣ በአዲስ አበባ ስታዲየም በ9 ሰዓት ደደቢት እና ኤሌክትሪክ እንዲሁም በ11፡30 መከላከያ ከጅማ አባቡና ይፋለማሉ፡፡
Continue Reading
1 Comment

1 Comment

  1. smegnew

    December 16, 2016 at 5:25 am

    fassil kenema is my heart of heart

Leave a Reply

Your email address will not be published.

Articles

የቶኪዮ 2020 ኦሊምፒክ የኢትዮጵያ የአትሌቲክስ ተሳትፎ ድህረ ምልከታ

Published

on

Medal Winners

በቶኪዮ 2020 ኦሊምፒክ በወረቀት ደረጃ ከውድድሩ መጀመር በፊት ቡድኑ ባመዛኙ በጥሩ ብቃት ላይ የሚገኙ ወጣት አትሌቶችን ስላካተተ ቢያንስ የለመድናቸውን ሁለት ወይም ሶስት የወርቅ ሜዳልያ ድሎች እንደማያሳጣን ተስፋ አድርጌ ነበር፡፡ ሆኖም የሜዳ ላይ ውጤቱ እንደተጠበቀው ሳይሆን ቀርቷል፡፡ ኢትዮጵያ በውጤታማነቷ በምትታወቅበት የአትሌቲክስ ፉክክር በአንድ የወርቅ፣ አንድ የብር፣ እና ሁለት የነሐስ በድምሩ በአራት ሜዳልያዎች ከዓለም 14ኛ ከአፍሪካ 3ኛ ደረጃን ይዛ ጨርሳለች፡፡ ይህም ሁሌም ለአፍሪካ የበላይነት ከምንፎካከራት ኬንያ ጋር ያለን ልዩነት ይበልጥ እንዲሰፋ አድጎታል፡፡ ከቅርብ ግዜ ወዲህ ሌላኛዋ የምስራቅ አፍሪካ ተቀናቃኛችን እየሆነች ከመጣችው ኡጋንዳም አንሰን እንድንገኝ አድርጎናል፡፡ የቶኪዮ ኦሊምፒክ በአትሌቲክሱ ከ1992ቱ የባርሴሎና ኦሊምፒክ ወዲህ ኢትዮጵያ ዝቅተኛ የሜዳልያ ስኬት ያስመዘገበችበትም ሆኖ አልፏል፡፡

አሉታዊ ጎኖች
ቶኪዮ የኢትዮጵያ አትሌቲክስ ውጤታማነት ፈር ቀዳጅ የሆነው ታላቁ አትሌት ሻምበል አበበ ቢቂላ በ1964 ዓ.ም. በተከታታይ ሁለተኛ የኦሊምፒክ ማራቶን ድሉን የተቀዳጀባት ከተማ ናት፡፡ እናም በቶኪዮ ከተማ በተከናወነው የኦሊምፒክ ውድድር የኢትዮጵያ ልዑካን ቡድን የሱን ክብር የሚያጎሉባቸውን ነገሮች ያደርጋሉ ብዬ ጠብቄ ነበር፡፡ የሆኑት ነገሮች ግን በተለይ በቡድኑ አስተዳዳሪዎች በኩል ፍፁም ኃላፊነት የጎደለውና ከጠበቅኩት በተቃራኒው ነበር፡፡ የኢትዮጵያ አትሌቲክስ ፌዴሬሽን እና የኢትዮጵያ ኦሊምፒክ ኮሚቴ ከአትሌቶች ምርጫ አንስቶ በቡድኑ የዝግጅት ወቅት በተካረረ ውዝግብ ውስጥ ነበር የከረሙት፡፡ የኦሊምፒክ ቡድኑን የማዘጋጀት እና የመምራት የጋራ ኃላፊነት የነበረባቸው ሁለቱ አካላት ይባስ ብለው ውዝግቡን ቶኪዮ ድረስ ይዘውት ሄደዋል፡፡ ይህ ሁሉ ሲሆን ሁለቱን አካላት በማቀራረብ በትልቁ ውድድር ላይ ያለንን ተሳትፎ እንከን አልባ ማድግ የሚጠበቅባቸውም ተመልካች ከመሆን የዘለለ ሚና አልነበራቸውም። የውዝግቡ አሉታዊ ትሩፋት በአትሌቶች ስነልቦና እና በአጠቃላይ የቡድኑ ውጤት ላይ የበኩሉን ተፅዕኖ ሳያሳርፍ እንዳላለፈ አያጠራጥርም፡፡

እንደ አለመታደል ሆኖ በቶኪዮ ኦሎምፒክ የኢትዮጵያን ልዑካን የመምራት ትልቁ ኃላፊነት የተሰጣቸው ሰዎች ኃላፊነት የጎደላቸው ነበሩ። የስፖርቱ አስተዳደሪዎች ትላልቅ ዓለም አቀፍ ውድድሮች በመጡ ቁጥር በአትሌቶች ምርጫ ዙሪያ የነበረውን ውዝግብ እንዲያቆሙልን እመኝ ነበር። ጭራሽ እራሳቸው ችግር ፈጣሪ ሆነው መገኘታቸው አስደንጋጭ እና አሳሳቢ ጉዳይ ነው፡፡ በመሮጫ መም ወይም በጎዳና ላይ በሚደረጉ ውድድሮች መሸነፍን በስፖርቱ ውስጥ ማሸነፍ እና መሸነፍ ያሉ የነበሩ እና ወደፊትም የሚኖሩ ነገሮች ስለሆኑ በፀጋ መቀበል ይቻላል፡፡ ተወዳዳሪዎቹ ውጤታማ እንዲሆኑ የስነልቦና ጥንካሬን ሊፈጥሩላቸው የሚገቡ ኃላፊዎች የእርስ በርስ ሽኩቻ ተቃራኒውን አሉታዊ ተፅዕኖ ሲያሳርፍ ማየት ግን ፍፁም ተቀባይነት የለውም፡፡ ለነገሩ ከስፖርቱ እድገት ይልቅ የፖለቲካ ግዴታቸው የሚያስጨንቃቸው የስፖርት አመራሮች በበዙባት ሀገር ስፖርቱ እንዲህ የማንም መጫወቻ ሲሆን ማየት አዲስ ነገር አይደለም፡፡  

የስፖርት አመራሮች ከፖለቲካ ተፅዕኖ ነፃ ሆነው ትኩረታቸውን ስፖርቱን በማስፋፋቱ እና ማሳደጉ ላይ አድርገው የሚሰሩ ስለስፖርቱም በቂ እውቀት እና ፍቅሩ ያላቸው ቢሆኑ መልካም ነው፡፡ ለቦታው በሚመጥን እና ኃላፊነቱን በአግባቡ መወጣት በሚችል የስፖርት አመራር የሚመራ የስፖርት ተቋምን መገንባት በተመሳሳይ ሰዓት የሀገር ግንባታን የሚደግፉ ሶስት ነገሮችን ስኬታማ ያደርጋል፡፡ በስፖርት ጤናውን የሚጠብቅ ማሕበረሰብ በመፍጠር በጤናው ሴክተር ላይ የሚኖረውን ጫና ይቀንሳል፣ በሀገር ገፅታ ግንባታ እና በኢኮኖሚው ዕድገት ላይም የበኩሉን ከፍተኛ አስተዋፅኦ ያደርጋል፡፡ በቶኪዮ ላይ የተመለከትናቸው የሀገርን ክብር ዝቅ ያደረጉ ግዴለሽነቶች ተገቢው ትኩረት ተሰጥቷቸው ሊታዩና አጥፊዎቹ ሊጠየቁበት ይገባል፡፡ በመጪዎቹ ዓመታት በሚጠብቁን ዓለም አቀፍ ውድድሮች ላይም የቶኪዮ ኦሊምፒኩን አይነት ሀፍረት እንዳይገጥመን ከወዲሁ ለችግሮቹ መፍትሔ መፈለግ አለበት፡፡

ባለፉት ዓመታት ኦሊምፒክ በመጣ ቁጥር በልዑካን ቡድኑ ውስጥ እየተካተቱ በሕዝብ ገንዘብ የሚዝናኑት የኦሊምፒክ ቱሪስቶች ጉዳይ ዘንድሮም ያልተቀረፈ ችግር ሆኖ ተስተውሏል፡፡ ከሌላው ግዜ በተለየ መልኩ ተጠባባቂ አትሌቶችን ይዞ መጓዝ ይጠይቅ በነበረው ውድድር ላይ አትሌቶቹን ትቶ ምንም የማይሰሩ ሰዎችን ይዞ መሄድ ትልቅ ቀልድ ነው፡፡  

ከሜዳ ውጭ የነበረው ውዝግብ ዋነኛ የትኩረት ማዕከል የነበረ መሆኑ በሜዳ ላይ የነበሩብንን ድክመቶች ሊያስረሳንም አይገባም፡፡ ስድስት የጎዳና ላይ ተወዳደሪዎቻችን እና አንድ የመም ተወዳዳሪ ውድድራቸውን ማቋረጣቸው በቶኪዮ ከታዩት ደካማ ጎኖቻችን መካከል የሚጠቀስ ነው፡፡ ችግሩ በዚህ ምክንያት ነው የተከሰተው ብሎ ለይቶ ለመናገር ባይቻልም ብዙ ግዜ ሲፈትነን ለሚስተዋለው የሞቃታማ ቦታ ውድድር የምናደርጋቸው ዝግጅቶችን መለስ ብሎ መመልከትን የሚጠይቅ ይመስለኛል፡፡ የተጎዳች አትሌትን ወደውድድር እንድትገባ ማድረግ እና በሁለት ደቂቃ ውስጥ ለማቋረጥ መገደዷም የአትሌቶች የጤና ክትትል ላይ ክፍተት እንዳለ የጠቆመን ክስተት ነው፡፡

የኢትዮጵያ ኦሊምፒክ ቡድን ወደውድድር ስፍራው ካቀናበት ግዜ ጀምሮ በቶኪዮ ምንም አይነት ቡድኑን የተመለከቱ ይፋዊ ጋዜጣዊ መግለጫዎች ወይም ፕሬስ ሪሊዞች አልነበሩም፡፡ ይህም እንደተለመደው የሕብረተሰቡን እና የመገናኛ ብዙሀንን ስለቡድኑ ቀጥተኛ መረጃ የማግኘት መብት የገደበ ነበር፡፡ ጋዜጠኞችም ሚዛናዊ ሆኖ ከመዘገብ ይልቅ ጎራ ለይተው ቃላት መወራወራቸው የህዝብን ትክክለኛ መረጃ የማግኘት መብት የነፈገ ነው፡፡ 

አዎንታዊ ጎኖች
ሰለሞን ባረጋ በወንዶች 10,000 ሜትር ወርቅ፣ ለሜቻ ግርማ በወንዶች 3000 ሜትር መሰናክል ብር፣ ጉዳፍ ፀጋዬ በሴቶች 5000 ሜትር ነሐስ፣ እና ለተሰንበት ግደይ በሴቶች 10,000 ሜትር ነሐስ ማስመዝገብ መቻላቸው የሚደነቅ ስኬት ነው፡፡

የመጪው ትውልድ አካል የሆኑት ተስፈኞቹ መቅደስ አበበ፣ ፍሬወይኒ ሀይሉ፣ በሪሁ አረጋዊ እና ጌትነት ዋለን ጨምሮ አምስት አትሌቶች ለሜዳሊያ የቀረበ የአራተኛነት ደረጃን ይዘው ማጠናቀቅ መቻላቸውም መልካም ነው፡፡ በተለይ ወጣቶቹ ያስመዘገቡት ውጤት በመጪዎቹ ዓመታት ተገቢውን ድጋፍ ካገኙ የምንጓጓለትን ድል ሊያስገኙልን እንደሚችሉ ያመላከተን ነው፡፡

የሀብታም አለሙ በኢትዮጵያ የኦሊምፒክ ተሳትፎ ታሪክ በሴቶች 800 ሜትር ለመጀመሪያ ግዜ ለፍፃሜ ተወዳዳሪነት መብቃት ምንም እንኳ በፍፃሜው የሜዳልያ ድል ባይቀናትም በአዎንታዊ ጎን ሊጠቀስ የሚችል ስኬት ነው፡፡

ከአንደኛ እስከ ስምንተኛ ደረጃን ይዘው ላጠናቀቁ አትሌቶች በሚሰጥ ነጥብ ድምር መሰረት በወጣው የነጥብ (ፕሌስመንት) ደረጃ ሰንጠረዥ ላይ በ64 ነጥብ ዘጠነኛ ሆነን ማጠናቀቃችንም እሰየው የሚያስብል ነው፡፡

በቶኪዮ ኦሊምፒክ ከአራተኛ እስከ ስምንተኛ ባሉት ደረጃዎች ውስጥ አጠናቀው ነጥብ ያስገኙ እና የዲፕሎማ ተሸላሚ የሆኑት አትሌቶች፡-
4ኛ – ፍሬወይኒ ሀይሉ – በሴቶች 1500 ሜትር
4ኛ – መቅደስ አበበ – በሴቶች 3000 ሜትር መሰናክል
4ኛ – ሮዛ ደረጀ – በሴቶች ማራቶን
4ኛ – በሪሁ አረጋዊ – በወንዶች 10,000 ሜትር
4ኛ – ጌትነት ዋለ – በወንዶች 3000 ሜትር መሰናክል
5ኛ – እጅጋየሁ ታዬ – በሴቶች 5000 ሜትር
6ኛ – ሀብታም አለሙ – በሴቶች 800 ሜትር
6ኛ – ሰንበሬ ተፈሪ – በሴቶች 5000 ሜትር
8ኛ – ዮሚፍ ቀጄልቻ – በወንዶች 10,000 ሜትር
8ኛ – ዘርፌ ወንድማገኝ – በሴቶች 3000 ሜትር መሰናክል

  • የአትሌቲክስ የነጥብ ደረጃ ሰንጠረዥ ከአንደኛ እስከ ስምንተኛ ባሉት ደረጃዎች ውስጥ የሚያጠናቅቁ አትሌቶች በሚያስመዘግቡት ነጥብ ድምር መሰረት የሚወጣ ሲሆን የነጥብ አሰጣጡም ለአንደኛ ደረጃ 8 ነጥብ፣ ለሁለተኛ ደረጃ 7 ነጥብ፣ ለሶስተኛ ደረጃ 6 ነጥብ፣ ለአራተኛ ደረጃ 5 ነጥብ፣ ለአምስተኛ ደረጃ 4 ነጥብ፣ ለስድስተኛ ደረጃ 3 ነጥብ፣ ለሰባተኛ ደረጃ 2 ነጥብ፣ እና ለስምንተኛ ደረጃ 1 ነጥብ ነው።

ከፊታችን ምን  እየጠበቀን ነው? ምንስ እናድርግ?
ባለፈው ዓመት በዓለም አቀፉ ወረርሺኝ ምክንያት ትልልቅ ዓለም አቀፍ ውድድሮች ለሌላ ግዜ እንዲተላለፉ መደረጉ ይታወቃል፡፡ ሌላ አስገዳጅ ሁኔታ ካልተፈጠረ በስተቀር ቀጣዮቹ አራት ዓመታት በተከታታይ በየዓመቱ ዓለም አቀፍ የአትሌቲክስ ውድድሮች የሚካሄዱባቸው ይሆናሉ፡፡ በ2022 የዓለም ሻምፒዮና፣ በ2023 የዓለም ሻምፒዮና፣ በ2024 የኦሊምፒክ ጨዋታዎች፣ እና በ2025 የዓለም ሻምፒዮና ውድድሮች ይኖራሉ፡፡ በቀጣዩ ዓመት በኢትዮጵያ የቀን አቆጣጠር ከሐምሌ 8 – 17/2014 በዩናይትድ ስቴትስ ኦሪጎን የሚካሄደው የዓለም አትሌቲክስ ሻምፒዮና አዘጋጆች ሙሉ የውድድሩን ፕሮግራም፣ የማራቶን እና የእርምጃ ውድድሮች የሚካሄዱባቸውን ቦታዎች በትላንትናው ዕለት ይፋ አድርገዋል፡፡ የዓለም ሻምፒዮናውን ውድድር በኃላፊነት የሚመራው የኢትዮጵያ አትሌቲክስ ፌዴሬሽንም ከወዲሁ ለዛ ውድድር ተሳትፎ የሚጠበቅበትን አቅዶ መንቀሳቀስ ይኖበርታል፡፡

ከምርጫ ጋር በተያያዘ የሚነሱ ጭቅጭቆችን ለማስቀረት ከወዲሁ ሁሉም አትሌቶች አውቀውት በውስጡ የሚያልፉበትን ገዢ የሆነ የመምረጫ መስፈርት ማዘጋጀት ቀዳሚው ተግባር መሆን አለበት፡፡ የመምረጫ መስፈርት ሁልግዜም በግላዊ ምልከታ እና ፍላጎቶች ላይ በሚመሰረት ምክንያት አነጋጋሪ መሆኑ የማይቀር ነው፡፡ ቢሆንም ባለድርሻ አካላቱን በሙሉ ባሳተፈ መልኩ ውይይት ተደርጎበት ቢወጣ ሁሉንም ገዢ እና ከጭቅጭቅ የፀዳ ሊሆን ይችላል፡፡ እዚህ ላይ በቶኪዮ ኦሊምፒክ ከተከሰቱት ሁኔታዎች አንፃር የሌሎች ሀገሮችንም ተሞክሮዎች በመዳሰስ ነገሩን ሰፋ አድርጎ መመልከት ቢቻል ጥሩ ነው፡፡ ትልልቅ ውድድሮች በመጡ ቁጥር በተደጋጋሚ እንደታዘብነው አንዳንድ አትሌቶች በቡድኑ ውስጥ ለመካተት የሚያደርጉትን ተገቢ ያልሆነ ሙከራም ማቆም አለባቸው፡፡ ከፋም ለማም ስፖርቱን እንዲመራ ኃላፊነት የተሰጠው ተቋም የሚያወጣቸውን መስፈርቶች ማክበርና በዛ ውስጥ ተመራጭ ለመሆን መሞከር ግድ እንደሚላቸውም መዘንጋት የለባቸውም፡፡ ማኔጀሮች እና አሰልጣኞች በተለይ በማራቶን የራሳቸውን አትሌት ለማስመረጥ የሚያደርጓቸው አላስፈላጊ ግፊቶችም ሊያቆሙ ይገባል፡፡

ለውድድሮች የምናደርጋቸውን ዝግጅቶች ጠንካራ እና ደካማ ጎኖች ከውድድሮች በኋላ መገምገም እና መታረም ያለባቸው ነገሮች ካሉ ማረም፡፡ ከፍተኛ ሙቀት በነበረባቸው በለንደን 2012 ኦሊምፒክ ሶስቱም የወንዶች ማራቶን ተወዳዳሪዎቻችን፣ በሞስኮ 2013 የዓለም ሻምፒዮና ሁለቱ የሴቶች ማራቶን ተወዳዳሪዎቻችን፣ በቶኪዮ ኦሊምፒክ ላይ አምስት የማራቶን (ሶስቱም ወንዶች እና ሁለት ሴቶች) ተወዳዳሪዎቻችን እንዲሁም የሴቶች እርምጃ ተወዳዳሪያችን ለማቋረጥ መገደዳቸውን አስተውለናል፡፡ ስለዚህ በጎዳና ላይ ውድድሮች ከባድ ሙቀት ለሚኖርባቸው ቦታዎች እንዴት መዘጋጀት አለብን የሚለው ጉዳይም በደንብ ሊታይ የሚገባው ይመስለኛል፡፡ አንዳንድ የመም (ትራክ) ተወዳዳሪ አትሌቶቻችን የውድድር ዓመቱ ሲጀምር ድንቅ ብቃታቸውን ያሳዩን እና ወደትልቅ ውድድር ሲቃረቡ አቋማቸው እየወረደ ይመጣል፡፡ አሰልጣኞቻቸው ለእነዚህ አይነቶቹ አትሌቶች ወደትልቅ ውድድር ሲቃረቡ ብቃታቸውን እያሳደጉ እንዲሄዱ የሚረዳቸውን የልምምድ ፕሮግራም ቢያዘጋጁላቸው መልካም ነው፡፡ በመካከለኛ ርቀት ውድድሮች ላይ በተለይ በወንዶች አሁንም በከፍተኛ ደረጃ የሚፎካከሩ አትሌቶችን ለማፍራት ጠንክረን መስራት ይጠበቅብናል፡፡

Continue Reading

Articles

የኢትዮጵያውያን አትሌቶች የቶኪዮ ኦሊምፒክ የአትሌቲክስ ማጣሪያ ውድድሮች የመጀመሪያ ሁለት ቀናት

Published

on

በሴቶች 5000 ሜትር የፍፃሜ ውድድር ላይ የሚፎካከሩት ኢትዮጵያውያን አትሌቶች

በቶኪዮ ኦሊምፒክ የመጀመሪያዎቹ ሁለት ቀናት የኢትዮጵያ አትሌቶች የተሳተፉባቸው የወንዶች 3000 ሜትር መሰናክል፣ 800 ሜትር በሁለቱም ፆታዎች፣ እንዲሁም የሴቶች 5000 ሜትር ማጣሪያዎች ሌላኛዎቹ የኢትዮጵያውያን የትኩረት ማዕከል የነበሩ ውድድሮች ናቸው፡፡ ቀጣዩ ዘገባ የኢትዮጵያውያኑን የማጣሪያ ውድድሮች ተሳትፎ እና ውጤቶች አንዲሁም ተጨማሪ መረጃዎችን ይዟል፡፡

የወንዶች 3000 ሜትር መሰናክል

በአትሌቲክስ ውድድሩ የመክፈቻ ቀን (ዓርብ ሐምሌ 23/2013) ጠዋት ላይ በተካሄደው የወንዶች 3000 ሜትር መሰናክል ማጣሪያ ከተሳተፉት ሶስት ኢትዮጵያውያን አትሌቶች መካከል ከምድብ አንድ ለሜቻ ግርማ (8፡09.83) በአንደኛነት፣ ከምድብ ሁለት ጌትነት ዋለ (8፡12.55) በሁለተኛነት ለፍፃሜው ሲያልፉ በምድብ ሶስት የተወዳደረው ታደሰ ታከለ (8፡24.69) ስምንተኛ ወጥቶ ለፍፃሜው ሳያልፍ ቀርቷል፡፡ ለሜቻ ጃፓናዊው ሚዩራ ዩጂን እና ኬንያዊው ቤንጃሚን ኪይገንን በማስከተል ከምድቡ ያሸነፈበት 8:09.83 በኦሊምፒክ የማጣሪያ ውድድሮች ላይ የተመዘገበ የምንግዜውም ፈጣን ሰዓት ሆኗል፡፡ የወንዶች 3000 ሜትር መሰናክል የፍፃሜ የሜዳልያ ፉክክር በዋናነት በኬንያውኑ ቤንጃሚን ኪገን እና አብራሀም ኪቢዎት፣ በኢትዮጵያውያኑ ለሜቻ ግርማ እና ጌትነት ዋለ እንዲሁም በሞሮኳዊው ሶፊያን ኤል ባካሊ መካከል እንደሚሆን ይጠበቃል፡፡

ኢትዮጵያ በወንዶች 3000 ሜትር መሰናክል በ1980ው የሞስኮ ኦሊምፒክ በሻምበል እሸቱ ቱራ አማካይነት ካስመዘገበችው የነሐስ ሜልያ ድል ወዲህ በርቀቱ በወንዶች ምንም አይነት የኦሊምፒክ ሜዳልያ ድል የላትም፡፡ ሆኖም ከቅርብ ግዜ ወዲህ እየታዩ የመጡ መሻሻሎች እና በዶሀው የዓለም ሻምፒዮና ላይ የተመዘገበው የብር ሜዳልያ ድል በቶኪዮም ሌላ ሜዳልያን ተስፋ እንድናደርግ ያነሳሳን ሆኗል፡፡ ዘግይቶ የተሰላፊ አትሌቶች ለውጥ ከተደረገባቸው ርቀቶች አንዱ በሆነው የወንዶች 3000 ሜትር መሰናክል በተጠባባቂነት የተመዘገበውና በዋናነት በ5000 ሜትር እንደሚወዳደር ይጠበቅ የነበረው ጌትነት ዋለ ወደመጀመሪያ ተሰላፊነት የመጣ ሲሆን ኃይለማሪም አማረ በመጨረሻ ሰዓት በለሜቻ ግርማ መተካቱም አነጋጋሪ የሆነ ሌላኛው ለውጥ ነው፡፡ ጌትነት በ3000 ሜትር መሰናክልም ጠንካራ ተፎካካሪ አትሌት ሲሆን በዶሀ የዓለም ሻምፒዮና ላይ አራተኛ ሆኖ ማጠናቀቅ ችሏል፡፡ በፍፃሜው ውድድር በ2019 የርቀቱ የዳይመንድ ሊግ ሻምፒዮን ጌትነት ዋለ እና በወቅቱ የዓለም ሻምፒዮና የብር ሜዳሊስት ለሜቻ ግርማ የሚወከለው የኢትዮጵያ ቡድን በቶኪዮ የኬንያውያኑን የበላይነት ለመግታትና አዲስ የስኬት ታሪክ ለማፃፍ እንደሚበቃ ተስፋ ተጥሎበታል፡፡                     

በ1984 በሎስ አንጀለስ ከተከናወነው የኦሊምፒክ ውድድር አንስቶ በተከታታይ በዘጠኝ የኦሊምፒክ ውድድሮች ወይም ላለፉት 36 ዓመታት የኦሊምፒክ የወንዶች 3000 ሜትር መሰናክል የወርቅ ሜዳልያ ድል በኬንያውያን ቁጥጥር ስር ይገኛል፡፡ በዓለም ሻምፒዮናም ተመሳሳይ የበላይነት ያላቸው ኬንያውያን ከ17 የዓለም ሻምፒዮና ውድድሮች በ14ቱ የወርቅ ሜዳልያው አሸናፊዎች ናቸው፡፡ ሆኖም ከሁለት ዓመት በፊት በዶሀው የዓለም ሻምፒዮና ላይ ከኢትዮጵያውያን እና ከሞሮኮ አትሌቶች የገጠማቸው ተግዳሮት ለመሸነፍ እጅግ አቅርቧቸው የነበረ መሆኑ አይዘነጋም፡፡ በአንድ ማይክሮ ሰከንድ ልዩነት አሸናፊነታቸውን ባረጋገጡበት በዶሀው ውድድር የተፈታተኗቸው ኢትዮጵያዊው ለሜቻ ግርማ እና ሞሮኳዊው ሶፊያን ኤል ባካሊ በቶኪዮው ፍፃሜ ለሌላ ብርቱ ፉክክር እየጠበቋቸው ይገኛሉ፡፡ ባለፉት ሁለት የዓለም ሻምፒዮናዎች በቅደም ተከተል የብር እና የነሐስ ሜዳልያን ያገኘው ሞሮኳዊው ሶፊያን ኤል ባካሊ በቶኪዮ ከሚወዳደሩት በሙሉ የላቀና 7፡58.15 የሆነ የራሱ ምርጥ ሰዓት ያለው ነው፡፡

ኬንያ በቶኪዮ ያለፈው ውድድር ሻምፒዮንነቱን ክብር የሚያስጠብቅላትን አትሌት ይዛ መቅረብ ሳትችል ቀርታለች፡፡ ከአምስት ዓመት በፊት በሪዮ የኦሊምፒክ እንዲሁም ከሁለት ዓመት በፊት በዶሀ የዓለም ሻምፒዮን የሆነው ኮንሰስለስ ኪፕሩቶ ባለፈው ወር በኬንያ የኦሊምፒክ ምርጫ ውድድር ላይ ውድድሩን ባለማጠናቀቁ የኦሊምፒክ ሻምፒዮንነት ክብሩን ለማስጠበቅ በቶኪዮ አልተገኘም፡፡ ስለዚህ አሁን የረጅም ግዜ የበላይነታቸውን የማስጠበቅ ኃላፊነቱ በ2019ኙ የዶሀ የዓለም ሻምፒዮና ላይ በቅደም ተከተል ስድስተኛ እና ሰባተኛ ሆነው ባጠናቀቁት ቤንጃሚን ኪገን እና አብራሀም ኪቢዎት ላይ ወድቋል፡፡  

የሴቶች 800 ሜትር

ከአትሌቲክሱ የጀመሪያ ቀን የጠዋት መርሀግብሮች አንዱ በነበረው የሴቶች 800 ሜትር ማጣሪያ በምድብ ሶስት በአሜሪካዊቷ አቲንግ ሙ ተቀድማ በ2 ደቂቃ ከ01.20 ሰከንድ ሁለተኛ የወጣችው ሀብታም አለሙ ለግማሽ ፍፃሜው ያለፈች ሲሆን በሁለተኛው ቀን ምሽት ላይ በተካሄደው የግማሽ ፍፃሜ ውድድር ላይም በአሜሪካዊቷ አቲንግ ሙ ተቀድማ በ1:58.40 ሁለተኛ በመሆን በኦሊምፒክ የውድድር ታሪክ ለመጀመሪያ ግዜ በርቀቱ ለፍፃሜ ውድድር የበቃች ኢትዮጵያዊት ሆናለች፡፡ ሀብታም ከውድድሩ በኋላ በቶኪዮ ለሚገኘው ባልደረባችን አብይ ወንድይፍራው በሰጠችው አጭር ቃል ‹‹ውድድሩ ትንሽ ፈታኝ ነበር ነገር ግን ለሀገሬ ስል ያለኝን አቅም ሁሉ ተጠቅሜያለሁ፡፡ ክብሩ ይስፋ ለመድኃኒዓለም በመጨረሻም አሪፍ ውጤት ላይ ደርሻለሁ፡፡ ለኦሊምፒክ የፍፃሜ ውድድር ሳልፍ የመጀመሪያዬ ነው፡፡ ከዚህ በፊትም ከኢትዮጵያ ለፍፃሜ የደረሰ ያለ አይመስለኝም እና አሁንም መጨረሻዬን ያሳምርልኝ ነው የምለው›› ብላለች፡፡  

በሴቶች 800 ሜትር የመጀመሪያ ዙር ማጣሪያ በምድብ አራት በ2.01.98 አራተኛ ሆና ያጠናቀቀችው ነፃነት ደስታ ወደ ግማሽ ፍፃሜው መቀላቀል ሳትችል ስትቀር በጀማሪዎች ስም ዝርዝር ላይ ስሟ ተካቶ በምድብ አንድ እንደምትሮጥ ስትጠበቅ የነበረችው ወርቅውሀ ጌታቸው ግልፅ ባልተደረገ ምክንያት ውድድሩን ሳትጀምር ቀርታለች፡፡

የወንዶ 800 ሜትር

የወንዶች 800 ሜትር የመጀመሪያ ዙር ማጣሪያ ላይ የተሳተፈው ኢትዮጵያዊው መለሰ ንብረት ከምድብ ሶስት በ1:47.80 ሰባተኛ ሆኖ በማጠናቀቅ ለግማሽ ፍፃሜው ማለፍ ሳይችል ቀርቷል፡፡ በመሐመድ አማን ስኬቶች በመነቃቃት ላይ የነበረው የወንዶች 800 ሜትር ከቅርብ ግዜ ወዲህ ኢትዮጵያ ሶስት ሰዓት የሚያሟሉ ተወካይ አትሌቶችን ለማግኘት እየተቸገረችበት የምትገኝ ርቀት እንደሆነ እየታየ ነው፡፡ የኦሊምፒክ ሚኒማ ማሟላት የቻለ አንድ አትሌት ብቻ ይዘን የቀረብንበት የቶኪዮ ኦሊምፒክም ይህ ችግር እንዳልተቀረፈ የታየበት ሌላኛው አጋጣሚ ሆኗል፡፡  

የሴቶች 5000 ሜትር ማጣሪያ

በአትሌቲክሱ የመጀመሪያ ቀን ሐምሌ 23/2013 ምሽት ላይ በተደረት የሴቶች 5000 ሜትር ማጣሪያ ላይ የተሳተፉት ሶስቱም ኢትዮጵያውያን አትሌቶች ሐምሌ 26/2013 ምሽት ላይ ለሚደረገው የፍፃሜ ውድድር አልፈዋል፡፡ ከምድብ አንድ ሰንበሬ ተፈሪ (14፡48.31) እና እጅጋየሁ ታዬ (14፡48.52) የኔዘርላንዷ ሲፋን ሀሳን (14፡47.89) እና ኬንያዊቷ አግነስ (14፡48.01) ቲሮፕን ተከትለው በቅደም ተከተል ሶተኛ እና አራተኛ ሆነው ሲያልፉ ከምድብ ሁለት ጉዳፍ ፀጋዬ (14፡55.74) ኬንያዊቷ ሔለን ኦቢሪ (14፡55.77) አስከትላ በአንደኛነት አልፋለች፡፡


ሐምሌ 26/2013 ምሽት ላይ በሚደረገው የሴቶች 5000 ሜትር የፍፃሜ ውድድር ላይ የሚፎካከሩት ኢትዮጵያውያን አትሌቶች

በሄንግሎ በተከናወነው የኢትዮጵያ የኦሊምፒክ ምርጫ ውድድር ላይ ባስመዘገበችው የራሷ ምርጥ 14:13.32 የርቀቱ የወቅቱ ፈጣን አትሌት ሆና ወደ ቶኪዮ ያቀናችው ጉዳፍ ለወርቅ ሜዳልያ ድል ከሚጠበቁት መካከል ናት፡፡ በሄንግሎው ውድድር ላይ ጉዳፍን በመከተል በቅደም ተከተል 14:14.09 እና 14፡15.24 በሆነ ሰዓት የጨረሱት እጅጋየሁ እና ሰንበሬም በዓለም የምንግዜም ምርጥ ዝርዝር ውስጥ የስድስተኛ እና ሰባተኛ ደረጃን ለመያዝ የበቁ ጠንካራ አትሌቶች ናቸው፡፡ የቶኪዮ ኦሊምፒክ የሴቶች 5000 ሜትር ተወዳዳሪዎች ዝርዝር ሶስቱን ኢትዮጵያውያን ጨምሮ ከዓለም የምንግዜም ምርጥ አስር የርቀቱ ሯጮች አምስቱን ያካተተ ነው፡፡ ኬንያውያኑ ሄለን ኦቢሪ እና አግነስ ቲሮፕ ከምንግዜም ምርጥ አስሮቹ ውስጥ የሚካተቱ ሲሆኑ በ12ኛ ደረጃ ላይ የምትገኘው ኔዘርላንዳዊቷ ሲፋን ሀሳንም የቶኪዮውን የፍፃሜ ፉክክር በጉጉት እንዲጠበቅ የምታደርግ ብርቱ አትሌት ናት፡፡

Continue Reading

Articles

ሰለሞን ባረጋ ለአስራ ሶስት ዓመት የራቀንን የወንዶች 10,000 ሜትር ድል በቶኪዮ ወደ ኢትዮጵያ መልሶታል

Published

on

218076583_1010892909482678_1235421043554241523_n

በቶኪዮ ኦሊምፒክ በጉጉት ሲጠበቅ የነበረው የአትሌቲክስ ውድድር በተጀመረ በሁለተኛው ቀን በወንዶች አስር ሺህ ሜትር ኢትዮጵያውያንን እጅግ ያስደስተው ድል በወጣቱ ሰለሞን ባረጋ አማካይነት ተመዝግቧል፡፡   
በ1980 ሞስኮ ላይ ምሩፅ ይፍጠር በርቀቱ ለመጀመሪያ ግዜ የኦሊምፒክ የወርቅ ሜዳልያ ካስገኘ በኋላ ከተደረጉት አስር የኦሊምፒክ የወንዶች 10 ሺህ ሜትር ውድድሮች ኢትዮጵያ አምስቱን በበላይነት ለመጨረስ ችላለች፡፡ የርቀቱ ንጉሶች ሀይሌ ገብረስላሴ እና ቀነኒሳ በቀለ ከ1992 እስከ 2008 ዓ.ም. በአራት ተከታታይ የኦሊምፒክ ውድድሮች ላይ በማሸነፍ የርቀቱ የወርቅ ድል ለኢትዮጵያ ብቻ የተሰጠ እንዲመስለን አድርገውንም ነበር፡፡ ከ2008ቱ የቤይጂንግ ኦሊምፒክ የቀነኒሳ በቀለ ድል በኋላ በተከሰተው የሞ ፋራህ የበላይነት ምክንያት ተመሳሳዩን ድል በቶኪዮ ለማየት 13 ዓመታትን መጠበቅ ግድ ብሎናል፡፡ ላለፉት አስራ ሶስት ዓመታት በጉጉት ስንጠብቀው የቆየነውን የ10 ሺህ ሜትር የኦሊምፒክ ድል በመጨረሻም ሰለሞን ባረጋ በቶኪዮ አጎናፅፎናል፡፡ የሰለሞን የቶኪዮ የወርቅ ሜዳልያ ድል ኢትዮጵያ ካለፉት አስራ አንድ ኦሊምፒኮች በርቀቱ ለስድስተኛ ግዜ የበላይ ሆና እንድትጨርስ ያስቻለም ነው፡፡ ድሉ በቶኪዮ የአትሌቲኪስ ውድድሮች የመጀመሪያው የወርቅ ሜዳልያ ድል ሆኖም ተመዝግቧል፡፡ ሰለሞን ባረጋ በ2018 የበርሚንግሀም የዓለም የቤት ውስጥ ውድድር በ3000 ሜትር እና በ2019 የዶሀ ዓለም ሻምፒዮና ላይ በ5000 ሜትር የብር ሜዳልያ ካገኘ በኋላ በመጀመሪያ የኦሊምፒክ ተሳትፎው ከፍተኛ ክብር የሚሰጠውን የ10,000 ሜትር የወርቅ ሜዳልያ ድል ለማሳካት በቅቷል፡፡

‹‹የ200 ሜትር እና 400 ሜትር አጫጨር የፍጥነት ሩጫ ልምምዶችን ስሰራ ስለነበረ ሁለት ዙር ሲቀር ውድድሩን እንደማሸንፍ ለራሴ ነገርኩት››
ሰለሞን ባረጋ ከቶኪዮው ድል በኋላ

ሰለሞን ባረጋ ከቶኪዮው ድሉ በኋላ በስፍራው ከሚገኘው የስራ ባልደረባችን አብይ ወንድይፍራው ጋር ባደረገው አጭር ቃለ ምልልስ የሚከተለውን ብሏል ‹‹ረጅም ርቀት የእኛ ስፖርት ነው ተብሎ ይታመናል፡፡ ሆኖም በኦሊምፒክ ውድድር ላይ ወርቅ ሜዳልያ ከወሰድን ብዙ ግዜ አልፎናል፡፡ ይህን ነገር ለመጨረሻ ግዜ ያሳካውም ቀነኒሳ ነበረ፡፡ ዛሬ በቶኪዮ ድሉን በማሳካቴ በጣም ደስተኛ ነኝ፡፡ በተለይ ለእኛ ከቶኪዮ ጋር አበበ ቢቂላን የምናስታውስበት ድል ስለሆነ ያንን በማሳካቴም በጣም ተደስቻለሁ፡፡ ዘንድሮ ከኡጋንዳ የዓለም ሪኮርድ የሰበረው ቼፕቴጌይ እና የዓመቱን ፈጣን ሰዓት የሮጠው ኪፕሊሞ ነበሩ፡፡ እናም ውድድሩ በጣም ይፈጥናል ብዬ ነበር የጠበቅኩት ግን አልተሮጠም፡፡ ውድድሩን የጨረስነውም 27 ቤት ነው፡፡ የ200 ሜትር እና 400 ሜትር አጫጨር የፍጥነት ሩጫ ልምምዶችን ስሰራ ስለነበረ ሁለት ዙር ሲቀር ውድድሩን እንደማሸንፍ ለራሴ ነገርኩት፡፡ ኡጋንዳውያኑ አትሌቶች ዛሬ ብዙም አልታገሉም፡፡ አብዛኛውን ሰዓት ከኋላ ነው የቆዩት እና እንደዚህ ይሆናል ብዬ አልጠበቅኩም ነበር፡፡ እነርሱን ካሜራ ላይም እያየኋቸው ስለነበር ስለነሱ ብዙም አልተጨነቅኩም እንደውም ከእነሱ ይልቅ የእኛን ልጆች ነበረ ይወጣሉ ብዬ የጠበቅኩት፡፡ በውድድሩ መሀል ተጠባቂ የሆኑት ኡጋንዳውያን ወደኋላ ቀርተው ሶስተኛው የቡድን አጋራቸው ወደፊት ወጥቶ በሰፊ ልዩነት ሲመራ እኛ እነሱን ስንጠብቅ እሱ አዘናግቶ እንዳያሸንፍ ልዩነቱን ለማጥበብ ሞክሬያለሁ፡፡ ምናልባት እነሱ እኛን ሲጠብቁ አንተ ሂድ ያሉት ነበር የመሰለኝ፡፡ ከዚህ በፊት በእንደዚህ አይነቱ ነገር ዳይመንድ ሊግ ላይ ስለተሸወድኩኝ ያንን እንዳይደግሙ ብዬ ነበረ ልዩነቱን ለማጥበብ የሞከርኩት፡፡ የአሰልጣኜንም ምክር እየሰማሁ ስለነበረ የምሮጠው እና ወደኋላ ተመለስ እያለኝ ስለነበር ወደኋላ ተመልሻለሁ፡፡ የእነርሱ እስትራቴጂ እሱን ወደፊት እንዲወጣ አድርገው እኛን ለማድከም ነበረ፡፡ ከበሪሁን ጋር ስንነጋገር ወደፊት ጠጋ በል እያልኩት ነበረ፡፡ ከበሪሁን ጋር ልምምድም አብረን ነበረ የምንሰራው፡፡ እኔ እንደውም ከአንድ እስከ ሶስት እንወጣለን ብዬ ነበር የጠበቅኩት አጋጣሚ ሆኖ አልተሳካም ነገር ግን ወርቁን ወደኢትዮጵያ በመመለሳችን በጣም ደስተኛ ነን፡፡›› ብሏል፡፡

Continue Reading

Trending